নিয়মীয়া বাৰ্তা, ৬ জুনঃ বিশ্বৰ সর্বাধিক পাৰিশ্রমিক লাভ কৰা চেলিব্রিটীৰ ফ’বছৰ এশজনীয়া বার্ষিক তালিকাত একমাত্র ভাৰতীয় অভিনেতা অক্ষয় কুমাৰে স্থান লাভ কৰিছে৷
বার্ষিক উপার্জনৰ ভিত্তিত ফ’বছে প্রকাশ কৰা তালিকাত বলীউডৰ ছুপাৰষ্টাৰ অক্ষয় কুমাৰে ৫২সংখ্যক স্থান লাভ কৰিছে৷ অভিনেতা অক্ষয় কুমাৰৰ বার্ষিক উপার্জন ৪৮.৫ নিযুত মার্কিন ডলাৰ৷ ভাৰতীয় মূল্যত ৩৬৬ কোটি টকা৷ বিগত ১০ বছৰ ধৰি অভিনেতা অক্ষয় কুমাৰে বলীউডত ইখনৰ পিছত সিখন ছুপাৰহিট ছবি দর্শকক উপহাৰ দিয়াই নহয়, ব্যৱসায়িকভাৱেও অভূতপূর্ব সফলতা লাভ কৰিছে৷ কমেডীৰ পৰা দেশপ্রেমমূলক, একচনৰ পৰা ৰোমাণ্টিক ছবিলৈকে অপাৰ সফলতা লাভ কৰা অক্ষয় কুমাৰে বিগত বর্ষতো ফ’বছৰ ১০০জনীয়া তালিকাত স্থান লাভ কৰিছিল৷
ইপিনে, তালিকাৰ শীর্ষস্থান লাভ কৰিছে ৰিয়েলিটী টিভি তাৰকা তথা প্রসাধন উদ্যোগপতি কাইলী জেনাৰে৷ এক নম্বৰ স্থানত কাইলী জেনাৰৰ বার্ষিক উপার্জন ৫৯০ মিলিয়ন মার্কিন ডলাৰ৷ ভাৰতীয় মূল্যত প্রায় ৪৫ হাজাৰ কোটি টকা৷ আন্তর্জাতিক ৰিয়লিটী টিভি ষ্টাৰ হিচাপে প্রখ্যাত কাইলী জেনাৰৰ ছ’চিয়েল মিডিয়াতো অভাৱনীয় জনপ্রিয়তা আছে৷ টিভি ষ্টাৰগৰাকীৰ ১৭৯ নিযুত অনুসৰণকাৰী আছে৷ দ্বিতীয় স্থানত আছে আন্তর্জাতিক সংগীত শিল্পী কেনী ৱেষ্ট৷ শিল্পীগৰাকীৰ বার্ষিক উপার্জন ১৭০ নিযুত মার্কিন ডলাৰ৷
তেনেদৰে তৃতীয় স্থানত আছে ১০৬.৩ নিযুত মার্কিন ডলাৰেৰে টেনিছ খেলুৱৈ ৰ’জাৰ ফেডেৰাৰ৷ চতুর্থ স্থানত আছে ফুটবল তাৰকা ক্রিষ্টিয়ানো ৰ’নাল্ডো৷ খেলুৱৈগৰাকীৰ বার্ষিক উপার্জন ১০৫ নিযুত মার্কিন ডলাৰ৷ আনহাতে পঞ্চম স্থানত আছে ১ নিযুত মার্কিন ডলাৰ ব্যৱধানেৰে আন এগৰাকী ফুটবল তাৰকা লি’নেল মেছি৷ তাৰকা ফুটবল খেলুৱৈ মেছিৰ বার্ষিক উপার্জন ১০৪ নিযুত মার্কিন ডলাৰ৷
