নিয়মীয়া বাৰ্তা, ২১ জুনঃ ৰাজস্থানৰ ছানছ’ৰত যোৱানিশা আকাশৰ পৰা প্রচণ্ড বিস্ফোৰণেৰে ২.৭৮ কিলোগ্রামৰ শিলাখণ্ড এটা মাটিত পৰাৰ পিছতেই অঞ্চলটোত হাহাকাৰময় পৰিৱেশৰ সৃষ্টি হয়৷ দুই কিলোমিটাৰ নিলগলৈকে শব্দ বিয়পি পৰা এই শিলাখণ্ডটোৰ স্থিতি স্থানীয় ৰাইজে প্রত্যক্ষ কৰাৰ পিছতে আৰক্ষীক অৱগত কৰায়৷
আৰক্ষী মহকুমাধিপতিৰ সৈতে ঘটনাস্থলীত উপস্থিত হোৱাৰ সময়ত শিলাখণ্ডটো প্রচণ্ড গৰম আছিল৷ কেইবাঘণ্টা ধৰি শিলাখণ্ডটো চেঁচা পৰাক লৈ অপেক্ষাৰ অন্তত শিলাখণ্ডটো আৰক্ষীয়ে লৈ যায়৷ প্রাৰম্ভিক তথ্য মতে, আকাশৰ পৰা খহি মাটিত পৰা শিলাখণ্ডটো উল্কাপিণ্ড বুলি ধাৰণা কৰিছে৷ আৰক্ষীয়ে এই উল্কাপিণ্ডটো স্থানীয় ব্যক্তিগত জুৱেলাৰী গৱেষণাগাৰত পৰীক্ষা কৰাত শিলাখণ্ডটো জার্মেনিয়াম, প্লেটিনিয়াম, নিকেল আৰু লোৰ দ্বাৰা গঠিত বুলি নিশ্চিত হয়৷
তথ্য মতে, শিলাখণ্ডটোৰ ১০.২৩ শতাংশ নিকেল, ৮৫.৮৬ শতাংশ লো, ০.৫ শতাংশ প্লেটিনাম, ০.৭৮ শতাংশ ক’বিড, ০.০২ শতাংশ জার্মেনিয়াম আৰু ৩.০২ শতাংশ কেইবাবিধ ধাতু আছে৷ সম্প্রতি ছানছ’ৰ আৰক্ষী থানাত থকা শিলাখণ্ডটোক লৈ স্থানীয় লোকসকলে উৎসুকতা প্রকাশ কৰি আছে৷ থানালৈ আহি অনেক লোকে এই উল্কাপিণ্ডসদৃশ শিলাখণ্ডটো প্রত্যক্ষ কৰি আছে৷ লক্ষণীয় যে শিলাখণ্ডটো আকাশৰ পৰা খহি পৰাৰ দিনা অঞ্চলটোৰ লোকসকল শংকিত হৈ আছিল৷