নিয়মীয়া বাৰ্তা ২৭ জুলাইঃ কার্গিল যুদ্ধৰ বিজয় দিৱস উপলক্ষে আজি শ্বহীদ হোৱা ভাৰতীয় জোৱানক শ্রদ্ধাঞ্জলি জনাই ৰাষ্ট্রপতি ৰাম নাথ কোৱিন্দে আর্মী হাস্পতাললৈ ২০ লাখ টকা বৰঙণি আগবঢ়ায়৷ ৰাষ্ট্রপতি কোৱিন্দে আগবঢ়োৱা এই ধনৰাশিয়ে ক’ভিড–১৯ যুঁজত চিকিৎসক আৰু পেৰামেডিকেলৰ কর্মীক সহায়ৰ বাবে সামগ্রী ক্রয় কৰিব সেনাই৷ এক বিবৃতিত এই কথা প্রকাশ কৰি ৰাষ্ট্রপতি কার্যালয়ে কয় যে ৰাষ্ট্রপতি ভৱনৰ ব্যয় হ্রাস কৰাৰ পৰিপ্রেক্ষিততেই ক’ৰোনা ভাইৰাছ মহামাৰীৰ বিৰুদ্ধে যুঁজা আর্মী হাস্পতাললৈ এই ধনৰাশি বৰঙণি হিচাপে আগবঢ়াবলৈ সক্ষম হৈছে৷ ৰাষ্ট্রপতিগৰাকীয়ে বৰঙণি হিচাপে আগবঢ়োৱা ধনেৰে দিল্লীৰ আর্মী হাস্পতালে পিএপিআৰ (পাৱার্ড এয়াৰ পিউৰিফায়িং ৰেছপিৰেটৰ) ইউনিটে ব্যৱহাৰ কৰা চিকিৎসা সামগ্রী ক্রয় কৰাত প্রাধান্য দিব বুলি সেনাই প্রকাশ কৰিছে৷ সশস্ত্র বাহিনীৰ ছুপ্রিম কমাণ্ডাৰ হিচাপে আর্মী হাস্পতালৰ ক’ভিড–১৯ যুঁজাৰুৰ মনোবল বৃদ্ধি কৰাৰ লক্ষ্যৰে ৰাষ্ট্রপতিগৰাকীয়ে এই ধন আগবঢ়াইছে৷