নিয়মীয়া বাৰ্তা ২৬ আগষ্টঃ মালিগাঁৱৰ আদিংগিৰিত সন্ত্রাস চলোৱা নৰখাদক নাহৰফুটুকীটো আজি পিঞ্জৰাবদ্ধ হয়৷ যোৱা ২১ আগষ্টৰ সন্ধিয়া নাহৰফুটুকীটোৰ আক্রমণত এটি ৬ বছৰীয়া শিশুৰ মৃত্যু হোৱাৰ পিছত বন বিভাগৰ লোকে নাহৰফুটুকীটোক ধৰিবলৈ টোপ দি পিঞ্জৰা পাতিছিল৷ যোৱা দুদিন ধৰি নাহৰফুটুকীটো পিঞ্জৰাবদ্ধ হোৱা নাছিল৷ কিন্তু নাহৰফুটুকীটোৱে আদিংগিৰি অঞ্চলত নিশাৰ ভাগত মুক্ত বিচৰণ কৰি আছিল৷ নাহৰফুটুকীটোৰ মুক্ত বিচৰণৰ দৃশ্য অঞ্চলটোৰ এজন লোকৰ ঘৰৰ চিচি টিভি কেমেৰাত আবদ্ধ হৈছিল৷ নাহৰফুটুকীৰ মুক্ত বিচৰণত আতংকিত লোকে ফুটগধূলিতে ঘৰত সোমাই থাকিবলগীয়া এক পৰিস্থিতিৰ সৃষ্টি হৈছিল৷ আজি নৰখাদক নাহৰফুটুকীটো পিঞ্জৰাবদ্ধ হোৱাত অঞ্চলটোৰ ৰাইজে স্বস্তিৰ নিশ্বাস পেলাইছে যদিও আদিংগিৰি পাহাৰত এতিয়াও ৫–৬টা নাহৰফুটুকীয়ে বিচৰণ কৰি থকা বুলি অঞ্চলবাসীয়ে জানিবলৈ দিছে৷