নিয়মীয়া বাৰ্তা, ২৯ আগষ্টঃ আই পি এললৈ মাজত মাথোঁ কেইটামান দিন বাকী থকা অৱস্থাত মোক্ষম আঘাতৰ সন্মুখীন হৈছে মহেন্দ্র সিং ধোনী নেতৃত্বাধীন চেন্নাই ছুপাৰ কিংছ৷ ৰাষ্ট্রীয় সংবাদ মাধ্যমত প্রকাশিত বাতৰি অনুসৰি সম্প্রতি ডুবাইত থকা দলটোৰ প্রায় ১৩গৰাকী সদস্য মাৰাত্মক ক’ৰোনা ভাইৰাছত আক্রান্ত হৈছে৷
চেন্নাই ছুপাৰ কিংছৰ এটা বিশ্বাসযোগ্য সূত্রৰ উদ্ধৃতিৰে প্রকাশিত বাতৰি মতে আক্রান্তসকলৰ ভিতৰত আছে চি এছ কেৰ নির্ভৰযোগ্য মিডিয়াম পেচাৰ দীপক চহৰ৷ ধোনীৰ নেতৃত্বত বিগত প্রায় চাৰি বছৰ ধৰি নিয়মীয়াকৈ চেন্নাই ছুপাৰ কিংছৰ হৈ খেলি থকা প্রতিভাৱান মিডিয়াম পেচাৰগৰাকীৰ লগতে দলটোৰ কেইবাগৰাকীও ছাপ’ট ষ্টাফ, অফিচিয়েল আৰু তেওঁলোকৰ পৰিয়ালবর্গৰ ক’ভিড পজিটিভ পোৱা গৈছে৷
অৱশ্যে চেন্নাই ছুপাৰ কিংছে আনুষ্ঠানিকভাৱে এইপর্যন্ত ক’ৰোনাত আক্রান্ত খেলুৱৈ আৰু বিষয়ববীয়াসকলৰ নাম প্রকাশ কৰা নাই৷ উল্লেখ্য যে আই পি এলৰ বাবে ডুবাইত উপস্থিত হোৱাৰ প্রথম, তৃতীয় আৰু ষষ্ঠ দিনা প্রতিগৰাকী খেলুৱৈ আৰু বিষয়ববীয়াৰ ক’ভিড টেষ্ট বাধ্যতামূলক কৰিছে ভাৰতীয় ক্রিকেট নিয়ন্ত্রণ ব’র্ডে৷ এই বাধ্যতামূলক ক’ভিড টেষ্টত চেন্নাই ছুপাৰ কিংছৰ প্রায় ১৩গৰাকী সদস্যৰ শৰীৰত মহামাৰী ক’ৰোনা ভাইৰাছৰ উপস্থিতি ধৰা পৰে৷ ইয়াৰ ফলত দলটোৱে পুনৰ ৭ দিনৰ কোৱাৰেণ্টাইনত থাকিব লাগিব আৰু অনুশীলনৰ বাবে ছেপ্ঢেম্বৰৰ প্রথম সপ্তাহলৈ অপেক্ষা কৰিব লাগিব৷
মন কৰিবলগীয়া যে মহেন্দ্র সিং ধোনী নেতৃত্বাধীন দলটো যোৱা ২১ আগষ্টত ডুবাইত উপস্থিত হৈছিল৷ ৬ দিনৰ কোৱাৰেণ্টাইন সম্পন্ন হোৱাৰ পিছত চি এছ কেৰ খেলুৱৈসকলে আজিৰ পৰা অনুশীলনত নমাৰ কথা আছিল৷ কিন্তু ১৩গৰাকীকৈ সদস্য ক’ভিড–১৯ত আক্রান্ত হোৱাৰ পিছত আই পি এলৰ অন্যতম সফল দলটো বিপদৰ সন্মুখীন হৈছে৷ ইফালে, চেন্নাই ছুপাৰ কিংছৰ এক সূত্রই সদৰী কৰা অনুসৰি ক’ভিডৰ পৰা পৰিত্রাণৰ বাবে তেওঁলোকে সকলো সতর্কতামূলক ব্যৱস্থা গ্রহণ কৰিছিল যদিও দুর্ভাগ্যজনকভাৱে কেইগৰাকীমান খেলুৱৈৰ শৰীৰত ক’ভিডৰ উপস্থিতি ধৰা পৰিছে৷