নিয়মীয়া বাৰ্তা, ২৯ আগষ্টঃ ভাৰতত অনুষ্ঠিত হ’বলগীয়া ২০২৩ৰ আই চি চি এদিনীয়া বিশ্বকাপত ৰোহিত শর্মাই নিজৰ শক্তিৰে ভাৰতক জয়ী কৰাবলৈ সক্ষম হ’ব৷ এই আশা প্রকাশ কৰিছে টীম ইণ্ডিয়াৰ বিস্ফোৰক অ’পেনাৰগৰাকীৰ শৈশৱৰ প্রশিক্ষক দীনেশ লাডে৷
মুম্বাইৰ ক্রিকেট মহলৰ জনপ্রিয় প্রশিক্ষকগৰাকীয়ে ষ্টাৰ স্প’টছৰ এক অনুষ্ঠানত কয় যে প্রতিভা আৰু পৰিশ্রমৰ বলত ৰোহিতে সফলতাৰ শিখৰ স্পর্শ কৰিছে৷ পৰৱর্তী এদিনীয়া বিশ্বকাপত তেওঁ নিজৰ শক্তি–সামর্থ্যৰে ভাৰতৰ হৈ বিশ্বকাপ জয় কৰিব বুলি মই আশাবাদী৷ স্কুলীয়া পর্যায়ৰ ক্রিকেটত ৰোহিতৰ বিৰল প্রতিভা প্রত্যক্ষ কৰি অভিভূত হোৱাৰ কথা স্মৰণ কৰি প্রশিক্ষক দীনেশ লাডে পুনৰ কয় যে ৰোহিতৰ খুৰাকে এদিন তেওঁক স্কুলৰ বাছনি শিবিৰলৈ লৈ আহিছিল৷ তাতেই তেওঁ প্রথমবাৰৰ বাবে ক্রিকেটাৰগৰাকীৰ প্রতিভা দেখিবলৈ পাইছিল৷