নিয়মীয়া বাৰ্তা, ৫ অক্টোবৰঃ জম্মু-কাশ্মীৰৰ পুলৱামা জিলাৰ কান্দিজাল দলঙৰ সমীপৰ ৰাষ্ট্ৰীয় ঘাইপথত অজ্ঞাত সন্ত্ৰাসবাদীৰ গুলীত শ্বহীদ হ’ল দুই চি আৰ পি এফ জোৱান।
১১০নং বেটেলিয়নৰ চি আৰ পি এফ জোৱানকেইজনে পহৰা দি থকা অৱস্থাত সন্ত্ৰাসবাদীয়ে গুলীৰে আক্ৰমণ কৰে। চি আৰ পি এফ জোৱানেও গুলীৰে প্ৰত্যুত্তৰ দিয়ে যদিও দুজন জোৱান নিহত হোৱাৰ লগতে আন তিনি জোৱান আঘাতপ্ৰাপ্ত হয়।
সেনা সূত্ৰই প্ৰকাশ কৰা মতে, জিলাখনৰ পামপুৰ বাইপাছৰ সমীপত আজি দিনৰ ১ বজাত এই আক্ৰমণ চলাইছিল সন্ত্ৰাসবাদীয়ে। সম্প্ৰতি অঞ্চলটো ঘেৰাও কৰি তালাচী চলাই থকা হৈছে আৰু আঘাতপ্ৰাপ্ত চি আৰ পি এফ জোৱানকেইজনক সামৰিক চিকিৎসালয়ত ভৰ্তি কৰোৱা হৈছে।