নিয়মীয়া বাৰ্তা ১৪ ডিচেম্বৰঃ অষ্ট্রেলিয়াৰ বিৰুদ্ধে অহা ১৭ ডিচেম্বৰৰ পৰা আৰম্ভ হ’বলগীয়া প্রথম টেষ্টত লোকেশ ৰাহুলক টীম ইণ্ডিয়াৰ অ’পেনাৰৰ দায়িত্ব দিয়া উচিত৷ বর্তমান তেওঁ সুন্দৰ ফর্মত থকাৰ প্রতি লক্ষ্য ৰাখি প্রতিভাৱান বেটছমেনগৰাকীক ইনিংছ মুকলিৰ দায়িত্ব দিলে টীম ইণ্ডিয়া উপকৃত হ’ব৷ এই তাৎপর্যপূর্ণ মন্তব্য আগবঢ়াইছে ভাৰতৰ প্রাক্তন বেগী বলাৰ আশিস নেহৰাই৷ ‘ভাৰতৰ অ’পেনিং যুটি কোন হ’ব, তাক লৈ ব্যাপক চর্চা অব্যাহত আছে৷ মায়ংক আগৰৱালৰ স্থান সুৰক্ষিত যদিও তেওঁৰ অ’পেনিং সহযোগী কোন হ’ব, সেয়া এতিয়াও নিশ্চিত হোৱা নাই৷ শুভমন গিল আৰু পৃথ্বি শ্ব’ৰ দৰে উদীয়মান অ’পেনাৰ দলৰ সৈতে আছে৷ কিন্তু মই অনুভৱ কৰোঁ যে অভিজ্ঞ লোকেশ ৰাহুলক ভাৰতে এই দায়িত্ব দিয়া উচিত৷ শেহতীয়াকৈ তেওঁ সুন্দৰ ফর্মত আছে আৰু অ’পেনাৰৰ ৰূপত তেওঁ ৰান সংগ্রহ কৰিব পাৰিলে ভাৰত অত্যন্ত উপকৃত হ’ব৷’– আশিস নেহৰাই এইদৰে কয়৷ উল্লেখ্য যে প্রায় এবছৰৰ মূৰত টেষ্ট দললৈ প্রত্যাৱর্তন ঘটা লোকেশ ৰাহুলে শেহতীয়াকৈ আইপিএলত চমকপ্রদ বেটিঙেৰে ৬৭০ ৰান সংগ্রহ কৰি অ’ৰেঞ্জ কেপ লাভ কৰিবলৈ সক্ষম হৈছিল৷ এদিনীয়া আৰু টি–২০ ক্রিকেটতো তেওঁ ভাৰতৰ হৈ দর্শনীয় প্রদর্শন দাঙি ধৰিছে৷