নিয়মীয়া বাৰ্তা, ২০ ডিচেম্বৰঃ ‘আছুৰ ৰাজনীতিকৰণ মই ভাবোঁ অসমৰ জাতীয় জীৱনৰ কাৰণে এটা ডাঙৰ অন্যায় হ’ল৷’ –এই মন্তব্য নেডাৰ আহ্বায়ক তথা ৰাজ্যৰ বিত্ত, স্বাস্থ্য, শিক্ষা, লোকনির্মাণ বিভাগৰ মন্ত্রী ড০ হিমন্ত বিশ্ব শর্মাৰ৷
শনিবাৰে গুৱাহাটীত সংবাদ মাধ্যমৰ আগত মন্ত্রী ড০ শর্মাই কয় যে আছুৱে ৰাজনৈতিক দল গঠন কৰাৰ পাছত আছুৰ গাত যিটো দাগ পৰিল, ইয়াৰ পৰা মুকলি হৈ ওলাই আহোঁতে বহু বছৰ লাগিব৷ হয়তো অসমত আন কোনো অৰাজনৈতিক ছাত্র সংগঠনৰ জন্ম হ’ব পাৰে৷ অসমৰ মানুহে আছুক কোনোবা ৰাজনৈতিক দলৰ ছাত্র সংগঠন হিচাপে ব্যৱহাৰ কৰিব৷
তেওঁ আৰু কয় যে এতিয়াৰে পৰা সদৌ অসম ছাত্র সন্থাৰ কোনোবা ল’ৰাই তেওঁলোকক ক’লা পতাকা দেখুৱালে যুৱ মর্চাই তেওঁলোককো ক’লা পতাকা দেখুওৱাৰ অধিকাৰ থাকিব৷ কাৰণ এতিয়াৰে পৰা আছুও ৰাজনৈতিক দল হ’ল৷ নতুন দল গঠনৰ বাবে অভিৱর্তন অনুষ্ঠিত কৰাৰ প্রসংগতো তীব্র কটাক্ষ কৰি তেওঁ কয় যে দলটো লুৰিণজ্যোতি গগৈয়ে গঠন কৰিছে৷ আছুৰ পৰা ওলাই আহিয়েই ৰাজনৈতিক দলটো গঠন কৰিব বুলি লুৰিণজ্যোতি গগৈয়ে কৈছে৷ আছু এৰাৰ দিনাই লুৰিণজ্যোতি গগৈয়ে নতুন দল গঠনৰ সিদ্ধান্ত লৈছিল৷ সেই দলত তেওঁ নতুনকৈ সভাপতি হ’ব যোৱাটো কোনো কথা নহয়৷ গোটেইখিনি কাম লুৰিণজ্যোতি গগৈয়ে নিজেই কৰা৷ নিজেই বিয়া পাতিছে৷ নিজেই দৰা–কইনা হৈছে৷ নিজেই খোৱা বিতৰণ কৰিছে৷ নিজেই কইনা লৈ ঘৰলৈ আহিছে৷ সেই অভিৱর্তনখন অদ্ভুত অভিৱর্তন হ’ল৷ অভিৱর্তনখনে আছুৰ ৰাজনীতিকৰণ সম্পূর্ণ কৰিলে৷
ইপিনে, অসমত চলি থকা বিভিন্ন আন্দোলনৰ প্রসংগতো তীব্র সমালোচনা কৰি মন্ত্রী ড০ শর্মাই কয় যে টিভি কেমেৰা আহিলে আন্দোলনকাৰীসকলে পাঁচ মিনিটমান সময় খুব চিঞৰে৷ কিন্তু আন্দোলন চলে ৬ ঘণ্টামান৷ ৬ ঘণ্টা সময় কেনেকৈ চিঞৰি থাকিব? টিভি কেমেৰা আহিলেহে চিঞৰিবলৈ আৰম্ভ কৰে৷ ভালদৰে চালে দেখিব আন্দোলনত অংশগ্রহণ কৰা মানুহৰ সংখ্যা ৫০–৬০জনমানহে থাকে৷ মানুহ এতিয়া আগৰ দৰে আন্দোলন কৰিবলৈ ওলাই নাহে৷