তালিবানে নিষিদ্ধ কৰিলে বহুবিবাহ প্রথা

নিয়মীয়া বাৰ্তা ১৬ জানুৱাৰীঃ আফগানিস্তানত তালিবানে দীর্ঘদিন ধৰি জেহাদী সংগঠনটোৰ মাজত চলি থকা বহুবিবাহ প্রথা বন্ধ কৰিছে৷ সংগঠনটোৰ শীর্ষ নেতৃত্বই জাৰি এক কঠোৰ নির্দেশনাত উল্লেখ কৰা হৈছে যে বহুবিবাহ প্রথাৰ বাবে শত্রু পক্ষৰ কঠোৰ সমালোচনাৰ সন্মুখীন হ’বলগীয়া হৈছে তালিবান৷ সংগঠনটোৰ বিভিন্ন পর্যায়ৰ নেতা তথা কমাণ্ডাৰসকলক এগৰাকীতকৈ অধিক পত্নী নাৰাখিবলৈ নির্দেশ দিছে শীর্ষ নেতৃত্বই৷ ইছলাম ধর্ম অনুসৰি একোজন পুৰুষে চাৰিগৰাকী পর্যন্ত মহিলাৰ স’তে বিবাহপাশত আবদ্ধ হ’ব পাৰে৷ অর্থাৎ ৪গৰাকী পত্নী লগত ৰাখিব পাৰে ইছলাম ধর্ম অনুসৰি একোজন পুৰুষে৷ বহুবিবাহ প্রথা এতিয়াও আফগানিস্তান, পাকিস্তান আৰু মুছলমানৰ আধিপত্য থকা কেইবাখনো দেশত বৈধ৷ তালিবানৰ এক সূত্রই সংবাদ সংস্থা বিবিচিক জনোৱা অনুসৰি এই বহুবিবাহ প্রথাৰ বাবে সংগঠনটোৰ অভ্যন্তৰত কমাণ্ডাৰসকলে ‘কইনাৰ মূল্য’ হিচাপে অধিক ধন দাবী কৰি আহিছে৷

লক্ষণীয়ভাৱে এই ধন আফগানিস্তান আৰু পাকিস্তানৰ বহু পাখতুন জনজাতিৰ যুৱতীক পত্নী হিচাপে গ্রহণ কৰিবলৈ পৰিয়ালক আদায় দিয়ে তালিবান কমাণ্ডাৰসকলে৷ যুৱতীৰ পৰিয়ালে ধন লাভ কৰাৰ পাছতেই তালিবান কমাণ্ডাৰলৈ তেওঁলোকক গতাই দিয়ে৷ তালিবান আৰু দেশখনৰ অভ্যন্তৰত চলি থকা এক স্পর্শকাতৰ ৰাজনৈতিক পৰিৱেশৰ মাজত সংগঠনটোৰ শীর্ষ নেতৃত্বই এই কঠোৰ নির্দেশনা জাৰি কৰাৰ লগে লগে ইয়াক লৈ সৃষ্টি হৈছে উত্তেজনা৷ বহু তালিবান নেতাই এই নির্দেশনাক গ্রহণ কৰিব বিচৰা নাই৷ কিন্তু আফগানিস্তানৰ শান্তি আলোচনাৰ মাজেৰে দেশখনৰ চৰকাৰৰ অংশীদাৰ হ’বলৈ চেষ্টা চলাই আছে তালিবান শীর্ষ নেতৃত্বই৷ গতিকে সংগঠনটোৱে আন্তর্জাতিক ক্ষেত্রত সমালোচনাৰ সন্মুখীন হোৱা বিভিন্ন নীতি পৰিহাৰ কৰাৰ চিন্তা–চর্চা চলাইছে৷ তাৰ অংশ হিচাপে বহুবিবাহ প্রথা বন্ধ কৰাৰ সিদ্ধান্ত লৈছে শীর্ষ নেতৃত্বই৷ অৱশ্যে আফগান তালিবানৰ শীর্ষ নেতা মুল্লা হিবাতুল্লাই বহুবিবাহৰ বিৰোধ কৰাৰ মূল কাৰণ ধনৰ অপচয় বুলিহে অভিহিত কৰিছে৷