নিয়মীয়া বাৰ্তা, ২৫ ডিচেম্বৰঃ “অসমৰ আকাশত যেতিয়াই সূৰ্যৰ পোহৰ আহে, যেতিয়াই অসমে উন্নয়নৰ পথলৈ আগবাঢ়ে, তেতিয়াই অসমৰ আকাশত কেতিয়াবা ক’লা ধোৱা আৰু কেতিয়াবা মেঘৰ আন্ধাৰো আহে । কিন্তু মেঘৰ অন্ধকাৰ সাময়িক, সূৰ্যৰ পোহৰ সদায় স্থায়ী । সেই সূৰ্যৰ পোহৰৰে আমি অসমখনক আগোৱাই লৈ যোৱাৰ বাবে কাম কৰি গৈ থাকিম ।”- বৰপেটা ৰোডৰ মৌন সমদলত উপস্থিত হৈ এই মন্তব্য ৰাজ্যৰ বিত্ত, স্বাস্থ্য আৰু গড়কাপ্টানী মন্ত্ৰী ডঃ হিমন্ত বিশ্ব শৰ্মাৰ ।
এই সভাতে অসম আন্দোলনৰ কথা উল্লেখ কৰি প্ৰাক্তন মুখ্যমন্ত্ৰী তৰুণ গগৈ আৰু প্ৰফুল্ল কুমাৰ মহন্তক তীব্ৰ কটাক্ষ কৰে ডঃ শৰ্মাই ।
লগতে অসমত চলি থকা ‘কা’ৰ বিৰোধী আন্দোলন প্ৰসংগত মন্তব্য প্ৰকাশ কৰি ডঃ শৰ্মাই কয় যে- অসমত ‘কা’ৰ বিৰুদ্ধে এক গণতান্ত্ৰীক আন্দোলন গঢ়ি উঠিছে । গণতান্ত্ৰীক আন্দোলনক ভাৰতীয় জনতা পাৰ্টিয়ে কেতিয়াও বিৰুদ্ধাচৰণ নকৰে । বৰঞ্চ সন্মানহে কৰে ।
লগতে এই সভাতে দৃঢ়তাৰে ডঃ হিমন্ত বিশ্ব শৰ্মাই মন্তব্য কৰে যে- “চাৰিওফালে প্ৰত্যাহ্বান আহিব, চাৰিওফালৰ পৰা কংগ্ৰেছ দলৰ ষড়যন্ত্ৰও হ’ব কিন্তু সৰ্বানন্দ সোণোৱাল, হিমন্তবিশ্ব শৰ্মাৰ দেহত এক বিন্দু তেজ থকালৈকে আমি ৰাষ্টাৰ পৰা আঁতৰি নাযাও । অসমক ভাৰতৰ পাঁচখন শক্তিশালী ৰাজ্যৰ ভিতৰত এখন ৰাজ্য হিচাপে নিৰ্মাণ কৰিমেই ।”
ইপিনে প্ৰতিবাদকাৰীসকলক উদ্দেশ্যি তেওঁ লগতে কয়- “আপোনালোকে আন্দোলন কৰিছে, আপোনালোকৰ মনত আৱেগ আছে, আপোনালোকৰ মনত হয়তো প্ৰশ্নও আছে, ভাৰতীয় জনতা পাৰ্টিয়ে সেই প্ৰশ্নৰ উত্তৰ দিবলৈ প্ৰস্তুত । ৰাজনৈতিকভাৱে, আলাপ-আলোচনাৰ মাজেৰে আপোনালোকৰ খং, আপোনালোকৰ আবেগক শ্ৰদ্ধা জনোৱা আমাৰ দায়িত্ব আৰু কৰ্তব্য । এই মঞ্চৰ পৰায়ে আমি অসমক ভাল পাই ৰাজপথলৈ ওলাই অহা প্ৰতিজন আন্দোলনকাৰীক নমস্কাৰ জনাইছো । তেওঁলোকৰ লগত আমি আলাপ-আলোচনাৰে সমস্যাৰ সমাধান কৰিম ।”