‘বাংলাদেশৰ স্বাধীনতাৰ বাবে মই কাৰাগাৰলৈ গৈছিলোঁ’

নিয়মীয়া বাৰ্তা, ২৭ মার্চঃ ‘বাংলাদেশৰ স্বাধীনতা সংগ্রাম মোৰ যাত্রাৰ এক গুৰুত্বপূর্ণ মুহূর্ত আছিল৷ মোৰ সতীর্থ আৰু মই ভাৰতত সত্যাগ্রহ কৰিছিলোঁ৷ ২০–২২ বছৰ বয়সত বাংলাদেশৰ স্বাধীনতা সংগ্রামৰ কাৰণে মই আনকি কাৰাগাৰলৈ যাবলগীয়া হৈছিলোঁ৷’ –এই মন্তব্য প্রধানমন্ত্রী নৰেন্দ্র মোদীৰ৷

বাংলাদেশৰ স্বাধীনতাৰ স্বর্ণ জয়ন্তী উপলক্ষে কালি দেশখনৰ ৰাজধানী ঢাকাৰ নেচনেল পেৰেড গ্রাউণ্ডত আয়োজিত এক অনুষ্ঠানত অংশগ্রহণ কৰি প্রধানমন্ত্রী মোদীয়ে এই মন্তব্য আগবঢ়ায়৷ বাংলাদেশৰ ৰাষ্ট্রপতি আব্দুল হামিদ আৰু প্রধানমন্ত্রী শ্বেখ হাছিনাৰ উপস্থিতিত ‘মুজিব জেকেট’ পৰিধান কৰি প্রধানমন্ত্রী মোদীয়ে দেশখনৰ জাতিৰ পিতা শ্বেখ মুজিবুৰ ৰহমানক স্মৰণ কৰে৷

বংগবন্ধু শ্বেখ মুজিবুৰ ৰহমানক স্মৰণ কৰি প্রধানমন্ত্রী মোদীয়ে কয়– ‘মোৰ জীৱনৰ বাবে আজিৰ দিনটো সবাতোকৈ স্মৰণীয় দিনৰ অন্যতম৷ বাংলাদেশে মোক এই কার্যসূচীত অন্তর্ভুক্ত কৰাৰ বাবে চিৰকৃতজ্ঞ৷’

বাংলাদেশ স্বাধীনতা সংগ্রামৰ সৈনিকৰ ত্যাগক কেতিয়াও দেশবাসীয়ে পাহৰিব নোৱাৰে বুলি উল্লেখ কৰি প্রধানমন্ত্রী মোদীয়ে দুই দেশৰ মাজত থকা সম্পর্কৰ বিষয়েও অৱগত কৰে৷

কালি পুৱা ১০.৩০ বজাত ঢাকাত অৱতৰণ কৰাৰ পাছতে প্রধানমন্ত্রী মোদীক আদৰণি জনায় প্রধানমন্ত্রী শ্বেখ হাছিনাই৷ মন কৰিবলগীয়া যে ভাৰতে প্রদান কৰি অহা গান্ধী শান্তি বঁটা–২০২০ বাংলাদেশৰ জাতিৰ পিতা শ্বেখ মুজিবুৰ ৰহমানক মৰণোত্তৰভাৱে প্রদান কৰা হয়৷