জালুকবাৰীত অপ্রতিৰোধ্য হিমন্ত বিশ্ব শর্মাঃ পাণ্ডু –মালিগাঁৱত ৰিণিকি ভূঞা শর্মাৰ ব্যাপক নির্বাচনী প্রচাৰ

নিয়মীয়া বাৰ্তা, ২ এপ্ৰিলঃ ৰাজ্য চৰকাৰৰ প্রভাৱশালী মন্ত্রী তথা ‘নেডা’ৰ আহ্বায়ক ড০ হিমন্ত বিশ্ব শর্মাই ৰাজ্যজুৰি বিজেপি নেতৃত্বাধীন মিত্রজোঁটৰ নির্বাচনী প্রচাৰত ব্যস্ত থকাৰ বাবে এইবেলি তেওঁৰ হৈ জালুকবাৰী সমষ্টিত নির্বাচনী প্রচাৰ চলাই আছে পত্নী ৰিণিকি ভূঞা শর্মাই৷ বুধবাৰে বিয়লিৰ পৰা নিশালৈ ৰিণিকি ভূঞা শর্মাইসমষ্টিটোৰ নগৰাঞ্চলৰ পাণ্ডু, মালিগাঁও, উত্তৰ জালুকবাৰীত বিজেপিৰ হাজাৰ হাজাৰ কর্মী–সমর্থকক লগত লৈ প্রচাৰ চলোৱাৰ পিছত পাণ্ডু–মালিগাঁও অঞ্চলত কালি যাব নোৱাৰা অঞ্চলসমূহত বৃহস্পতিবাৰে বিয়লি ৪ বজাৰ পৰা স্বামী ড০ হিমন্ত বিশ্ব শর্মাৰ হৈ অলিয়ে–গলিয়ে নির্বাচনী প্রচাৰ অভিযান চলায়৷

অভিযানত দ্বিজেন লহকৰ, কমল দে’, ইফটিকাৰ আলী (বাবু), ৰীণা কাজী, ইতিমা আহমেদ, লক্ষ্মী লহকৰ, নিশা দাস, নিতাই দে’, নিৰোদ ৰায়কে ধৰি কেইবাজনো বিজেপি নেতাই সংগ দিয়ে৷

আনহাতে প্রচাৰ অভিযানৰ সময়ত কেইবাখনো পথসভাত ভাগ লৈ ৰিণিকি ভূঞা শর্মাই কয়– ২০১৬ চনৰ দৰে এইবেলিও অসমত বিজেপি নেতৃত্বাধীন মিত্রজোঁটৰ চৰকাৰ গঠন হ’ব আৰু ২ মে’ৰ ফলাফললৈ হ’ব মাত্র সময়ৰ অপেক্ষা৷ হিমন্ত বিশ্ব শর্মাই যাতে পূর্বতকৈও অধিক ভোটত বিজয়ী হৈ সমষ্টিটোৰ আৰু অধিক উন্নয়ন কৰিব পাৰে, তাৰ বাবে হাতে–কামে নামি পৰিবলৈ তেওঁ সকলোকে আহ্বান জনায়৷

আনহাতে প্রচাৰ অভিযানৰ সময়ত কর্মী–সমর্থকসকল বিজেপি জিন্দাবাদ, নৰেন্দ্র মোদী জিন্দাবাদ, সর্বানন্দ সোণোৱাল জিন্দাবাদ, হিমন্ত বিশ্ব শর্মা জিন্দাবাদ, ভাৰত মাতা কী জয় ধ্বনিৰে আকাশ–বতাহ মুখৰ কৰি তোলে৷

ইফালে, জালুকবাৰী সমষ্টিত মন্ত্রী ড০ হিমন্ত বিশ্ব শর্মাৰ হৈ সমষ্টিটোৰ ৰাইজে ঘৰে ঘৰে গৈ প্রচাৰ অভিযান চলোৱাৰ বিপৰীতে কংগ্রেছ মহাজোঁটৰ প্রার্থী ৰমেন চন্দ্র বৰঠাকুৰৰ প্রচাৰত ৰাইজৰ সঁহাৰি দেখিবলৈ পোৱা নাই৷ বিৰোধীৰ নিস্তেজ প্রচাৰৰ বিপৰীতে সমষ্টিটোত এইবাৰ ড০ শর্মাক অভিলেখসংখ্যক ভোটত জয়ী কৰোৱাৰ পণ লৈছে সমষ্টিবাসীয়ে৷