নিয়মীয়া বাৰ্তা, ২ এপ্ৰিলঃ পশ্চিম গুৱাহাটীত কংগ্রেছ মহাজোঁটৰ প্রার্থী মীৰা বৰঠাকুৰ গোস্বামীৰ হৈ কালি নির্বাচনী প্রচাৰ চলায় প্রদেশ কংগ্রেছৰ সভাপতি ৰিপুণ বৰা আৰু সাংসদ গৌৰৱ গগৈয়ে৷ লখৰাৰ খেলপথাৰত অনুষ্ঠিত নির্বাচনী সভাত অংশগ্রহণ কৰি সাংসদ গৌৰৱ গগৈয়ে পশ্চিম গুৱাহাটী সমষ্টিৰ উত্তৰণ আৰু উন্নয়নৰ বাবে মহাজোঁটৰ প্রার্থী মীৰা বৰঠাকুৰক বিপুল ভোটত জয়যুক্ত কৰিবলৈ ৰাইজক আহ্বান জনায়৷ দ্বিতীয় আৰু তৃতীয় পর্যায়ৰ নির্বাচনত কংগ্রেছে ভাল ফল দেখুৱাব বুলিও গগৈয়ে মন্তব্য কৰে৷
সভাত অংশগ্রহণ কৰি প্রদেশ কংগ্রেছৰ সভাপতি ৰিপুণ বৰাই ২৮খন আসন লাভ কৰিব বুলি মন্তব্য কৰে৷ তেওঁ লগতে ৰমেন্দ্র নাৰায়ণ কলিতাৰ ২৫ বছৰীয়া ব্যর্থতাৰ বিৰুদ্ধে ভোটদান কৰি কংগ্রেছ মহাজোঁটৰ প্রার্থী মীৰা বৰঠাকুৰক বিপুল ভোটত জয়ী কৰিবলৈ ৰাইজক আহ্বান জনায়৷ ইয়াৰ পিছতে বিজেপি–মিত্রজোঁটৰ প্রার্থী ৰমেন্দ্র নাৰায়ণ কলিতাৰ দুর্গ কঁপাই আজি মীৰা বৰঠাকুৰে লখৰাৰ পৰা হাজাৰ হাজাৰ সমর্থকক লগত লৈ সমষ্টিটোৰ বিভিন্ন স্থানত বিশাল বাইক ৰেলীৰে ৰাইজৰ দৃষ্টি আকর্ষণ কৰে৷
লখৰাৰ পৰা আৰম্ভ হোৱা ৰেলী লালগণেশ, চাইকেল ফেক্টৰী, বিষ্ণুপুৰ, ফটাশিল, কুমাৰপাৰা, মাছখোৱা, ভৰলুমুখ, শান্তিপুৰ, দুর্গাসৰোবৰ, কামাখ্যা গেট, মালিগাঁও ৩নং গেট হৈ গোশালা, গোটানগৰ, সাতমাইল, খানামুখ হৈ লখৰাত ৰেলীৰ সামৰণি মাৰে৷ হাজাৰ হাজাৰ সমর্থকৰ সৈতে বিশাল ৰেলীৰে নির্বাচনী প্রচাৰ চলোৱা মীৰা বৰঠাকুৰক বিভিন্ন স্থানত ৰাইজে বিপুল আদৰণি জনায়৷ লক্ষণীয় যে তৃতীয় পর্যায়ৰ নির্বাচনলৈ মাজতে চাৰিটা দিন থকা অৱস্থাত পশ্চিম গুৱাহাটী সমষ্টিত আকর্ষণীয় হৈ পৰিছে প্রার্থীৰ নির্বাচনী প্রচাৰ অভিযান৷ বিজেপি মিত্রজোঁটৰ সমান্তৰালকৈ কংগ্রেছ মহাজোঁটৰ প্রার্থীকে ধৰি আন আন দল আৰু নির্দলীয় প্রার্থীসকলেও অব্যাহত ৰাখিছে নির্বাচনী প্রচাৰ অভিযান৷