নিয়মীয়া বাৰ্তা, ৫ এপ্রিলঃ চেন্নাই ছুপাৰ কিংছৰ জার্ছীক লৈ আপত্তি দর্শাইছে ইংলেণ্ডৰ অলৰাউণ্ডাৰ তাৰকা মঈন আলীয়ে৷ মহেন্দ্র সিং ধোনি নেতৃত্বাধীন দলটোত প্রথমবাৰৰ বাবে চুক্তিবদ্ধ হোৱা ৩৩ বছৰীয়া অলৰাউণ্ডাৰগৰাকীয়ে চেন্নাই ছুপাৰ কিংছৰ জার্ছীত সুৰা প্রস্তুতকাৰী কোম্পানীৰ লগ’ লাগি থকাক লৈ আপত্তি দর্শাইছে৷
আই পি এলত তেওঁ পৰিধান কৰিবলগীয়া জার্ছীৰ পৰা এই লগ’ আঁতৰাই দিবলৈ ইংৰাজ ক্রিকেটাৰগৰাকীয়ে চি এছ কেক দাবী জনাইছে৷ সময়োপযোগী বলিং আৰু বেটিঙেৰে দললৈ মূল্যৱান অৰিহণা আগবঢ়োৱা মঈন আলীৰ এই দাবী চেন্নাই ছুপাৰ কিংছে সহজতে মানি লৈছে আৰু তেওঁৰ জার্ছীৰ পৰা সুৰা প্রস্তুতকাৰী কোম্পানীৰ লগ’ আঁতৰাই দিয়াৰ সিদ্ধান্ত লৈছে৷
উল্লেখ্য যে পূর্বে আৰ চি বিৰ হৈ খেলা ইংলেণ্ডৰ অলৰাউণ্ডাৰগৰাকীক এইবাৰ ধোনী বাহিনীয়ে ৭ কোটিৰ বিনিময়ত ক্রয় কৰিছে৷ চেন্নাই ছুপাৰ কিংছ অহা ১০ এপ্রিলত খেলপথাৰত নামিব৷