নিয়মীয়া বাৰ্তা ১২ এপ্ৰিলঃ কামৰূপৰ দদৰা–দলিবাৰী অঞ্চলৰ গো–চৰণীয়া পথাৰত বেদখল উচ্ছেদ কৰি গো–চৰণীয়া পথাৰখন মুকলি কৰাৰ নির্দেশ জাৰি কৰে গুৱাহাটী উচ্চ ন্যায়ালয়ে৷ উল্লেখ্য যে লেখক, জ্যেষ্ঠ সাংবাদিক তথা অসম সাংস্কৃতিক মহাসভাৰ কেন্দ্রীয় উপ–সভাপতি ড০ পংকজ লোচন বৈশ্যই দলিবাৰী গো–চৰণীয়া পথাৰৰ ৮১ বিঘা মাটি বেদখলমুক্ত কৰাৰ বাবে গুৱাহাটী উচ্চ ন্যায়ালয়ত গোচৰ তৰিছিল৷ উল্লেখ্য যে গো–চৰণীয়া পথাৰখনত ইতিমধ্যে কেইবাটিও স্থায়ী গৃহ নির্মাণৰ কাম চলি আছে৷ যাৰ পৰিপ্রেক্ষিতত বৃহত্তৰ অঞ্চলটোৰ গো–ধনৰ বাবে ভীষণ সমস্যাই দেখা দিয়াৰ সম্ভাৱনা আছে৷
পংকজ লোচন বৈশ্যই দিয়া গোচৰৰ ভিত্তিত গুৱাহাটী উচ্চ ন্যায়ালয়ৰ মুখ্য ন্যায়াধীশ সুধাংশু ধুলীয়া আৰু ন্যায়াধীশ মানস ৰঞ্জন পাঠকৰ দুজনীয়া বিচাৰপীঠে পি আই এল ১৬/২০২১ গোচৰ মর্মে যোৱা ২৬ মার্চত তাৎক্ষণিকভাৱে বেদখল হৈ থকা দলিবাৰী গো–চৰণীয়া পথাৰ মুক্ত কৰিবলৈ নির্দেশ জাৰি কৰে৷ এই নির্দেশ যোৱা ৮ এপ্রিলত কামৰূপ (গ্রাম্য) উপায়ুক্তলৈ প্রেৰণ কৰিছে৷ নিয়ম মতে গো–চৰণীয়া পথাৰত কোনোধৰণৰ স্থায়ী ভৱন নির্মাণ কৰিব নোৱাৰে৷ কামৰূপৰ উপায়ুক্তক গুচৰীয়াই শীঘ্রে ন্যায়ালয়ৰ নির্দেশ মর্মে দলিবাৰীৰ গো–চৰণীয়া পথাৰ বেদখলমুক্ত কৰিবলৈ দাবী জনাইছে৷