নিয়মীয়া বাৰ্তা, ১৩ এপ্রিলঃ মহামাৰী ক’ভিড–১৯ৰ ভয়াৱহ সংক্রমণে পুনৰ এবাৰ জাপানত আতংকৰ সৃষ্টি কৰাৰ পৰিপ্রেক্ষিতত জাপানৰ অধিকাংশ নাগৰিকে সমাগত টকিঅ’ অলিম্পিক বাতিল হোৱাটো বিচাৰিছে৷
জাপানৰ এটি সংবাদ প্রতিষ্ঠানে চলোৱা সমীক্ষা অনুসৰি দেশখনৰ ৭০ শতাংশ নাগৰিকে অহা জুলাই–আগষ্টত টকিঅ’ত অনুষ্ঠিত হ’বলগীয়া বিশ্বৰ সর্ববৃহৎ ক্রীড়া মহোৎসৱ বাতিল অথবা পিছুৱাই দিয়াৰ পোষকতা কৰিছে৷ মাত্র ২৪.৫ শতাংশ নাগৰিকেহে অলিম্পিক সময়মতে অনুষ্ঠিত হোৱাটো বিচাৰিছে৷
মন কৰিবলগীয়া যে ক’ৰোনা ভাইৰাছৰ চতুর্থটো ঢৌৱে টকিঅ’ত আতংকৰ সৃষ্টি কৰাৰ বাবে চহৰখনত সোমবাৰৰ পৰা কঠোৰ নীতি–নিয়ম বলৱৎ কৰা হৈছে৷ অৱশ্যে ক’ভিডৰ আতংক অব্যাহত থাকিলেও টকিঅ’ অলিম্পিকৰ আয়োজক মণ্ডলীয়ে প্রস্তুতি অব্যাহত ৰাখিছে৷ আয়োজক কমিটীয়ে এথলিটসকলৰ বাবে ৩০০ হোটেলৰ কোঠা বুকিং কৰা বুলি শেহতীয়াকৈ জানিব পৰা গৈছে৷