নিয়মীয়া বাৰ্তা ২২ মেঃ ছাউদাম্পটনত নিউজিলেণ্ডৰ বিপক্ষে খেলিবলগীয়া বিশ্ব টেষ্ট চেম্পিয়নশ্বিপৰ ফাইনেল মেচখনক লৈ সম্পূর্ণৰূপে সাজু হৈছে ভাৰতীয় দলটোৰ তাৰকা বেটছমেন শ্বেটেশ্বৰ পূজাৰা৷ ১৮ জুনৰ পৰা আৰম্ভ হ’বলগীয়া ফাইনেল মেচখন সন্দর্ভত পূজাৰাই কয় যে বর্তমান বিৰাট কোহলি নেতৃত্বাধীন ভাৰতীয় দলটো দুর্দান্ত ফর্মত আছে৷ বিশ্বৰ যিকোনো স্থানত যিকোনো দলকে পৰাস্ত কৰাৰ আমাৰ সামর্থ্য আছে৷ ফাইনেল মেচখনৰ প্রস্তুতিক লৈ অধিক সময় লাভ কৰা নাই যদিও দলটোৱে মেচখনত উন্নত প্রদর্শন কৰিব পাৰিব বুলি মই আত্মবিশ্বাসী৷ বিশ্ব টেষ্ট চেম্পিয়নশ্বিপৰ ফাইনেল মেচখন দুটা শীর্ষস্থানীয় দলৰ মাজত অনুষ্ঠিত হ’ব৷ মেচখনত দুয়োটা দলে উন্নত প্রদর্শন দাঙি ধৰাৰ বাবে চেষ্টা কৰিব৷ ভাৰতীয় দলটোৰ বেটিং আৰু বলিং দুয়োটা বিভাগ অধিক শক্তিশালী৷ শেহতীয়া অষ্ট্রেলিয়া ভ্রমণেই ইয়াৰ উদাহৰণ৷ মুঠতে ভাৰতীয় দলটোৱে ডব্লিউ টি চিৰ ফাইনেল মেচখনত উন্নত প্রদর্শন দাঙি ধৰিব পাৰিব বুলি আত্মবিশ্বাসী পূজাৰা৷ উল্লেখ্য যে নিউজিলেণ্ডৰ বিপক্ষে ফাইনেল মেচখন খেলাৰ পিছতে ইংলেণ্ডৰ বিপক্ষে খেলিবলগীয়া পাঁচখনীয়া টেষ্ট মেচৰ শৃংখলাটোক লৈও ভাৰতীয় দলটো সম্পূর্ণৰূপে সাজু আছে বুলি মন্তব্য কৰে পূজাৰাই৷