নিয়মীয়া বাৰ্তা ২ জানুৱাৰীঃ ইংৰাজী নৱবর্ষৰ প্রথম দিনাই প্রেমৰ সম্পর্ক ৰাজহুৱা কৰিলে ভাৰতীয় ক্রিকেট দলৰ অলৰাউণ্ডাৰ হার্দিক পাণ্ডিয়াই৷ ছার্বিয়াৰ অভিনেত্রী নাটাছা ষ্টানক’ভিচৰে বাগদান কৰাৰ কথা নৱবৰ্ষৰ দিনাই ছ’চিয়েল মিডিয়া ইনষ্টাগ্রামৰ জৰিয়তে ৰাজহুৱা কৰিলে ভাৰতীয় ক্রিকেটাৰগৰাকীয়ে৷ ছার্বিয়াৰ অভিনেত্রী নাটাছাৰে বাগদান হোৱা বুলি হার্দিক পাণ্ডিয়াই দুয়োৰে ফটো ইনষ্টাগ্রামত আপলোড কৰে৷ মন কৰিবলগীয়া যে দুয়োৰে প্রেমৰ সম্পর্কক লৈ বিগত সময়ছোৱাত ছ’চিয়েল মিডিয়াত বাতৰি ওলাইছিল যদিও এই সন্দর্ভত হার্দিক পাণ্ডিয়াই কোনো মন্তব্য আগবঢ়োৱা নাছিল৷ কিন্তু ক্রিকেটাৰগৰাকীয়ে ছার্বিয়ান অভিনেত্রীগৰাকীৰে বাগদানৰ কথা ৰাজহুৱা কৰাত অনুৰাগীৰ মাজত খলকনি সৃষ্টি কৰিছে৷ অলৰাউণ্ডাৰগৰাকীয়ে নাটাছাৰে ফটো ছ’চিয়েল মিডিয়াত আপলোড কৰাৰ লগে লগে ভাৰতীয় দলটোৰ লেগ স্পীনাৰ যুজবেন্দ্র চাহালে অভিনন্দন জনাইছে৷ উল্লেখ্য যে পিঠিত পোৱা আঘাতৰ বাবে হার্দিক পাণ্ডিয়াই ২০১৯ চনৰ ছেপ্ঢেম্বৰ মাহৰ পৰা আন্তর্জাতিক ক্রিকেটৰ পৰা আঁতৰি আছে৷ দক্ষিণ আফ্রিকাৰে খেলা টি–২০ মেচখনত পাণ্ডিয়াই পিঠিত আঘাত পাইছিল৷