নিয়মীয়া বাৰ্তা ২১ জুনঃ ভয়াৱহ খাদ্য সংকটৰ সন্মুখীন হোৱা উত্তৰ কোৰিয়াত এতিয়া মূল্যবৃদ্ধি আকাশলংঘী হৈ পৰিছে৷ নিত্য প্রয়োজনীয় খাদ্যসামগ্রীৰ অভাৱনীয় মূল্যবৃদ্ধিৰ বাবে কট্টৰ কমিউনিষ্ট ৰাষ্ট্রখনত জনসাধাৰণে জীয়াতু ভুগিবলগীয়া হৈছে৷ ২০২০ চনত ক’ভিড–১৯ মহামাৰীৰ বাবে সীমান্ত পথ বন্ধ কৰি দিয়াৰ লগে লগে বাণিজ্যিক ক্ষেত্রলৈ নামি আহিছে সংকট৷ সীমান্তৰ বাণিজ্যত সংকট সৃষ্টি হোৱাৰ লগে লগে বিভিন্ন সামগ্রীত অভাৱনীয় দামবৃদ্ধি ঘটিছে৷
লক্ষণীয়ভাৱে মাত্র দুদিন পূর্বে উত্তৰ কোৰিয়া ভয়াৱহ খাদ্য সংকটৰ সন্মুখীন হোৱা বুলি ঘোষণা কৰিছিল ৰাষ্ট্রপতি কিম জং উনে৷ আনকি ৰাষ্ট্রপতিগৰাকীয়ে পৰিস্থিতি অধিক জটিল হৈ পৰিব বুলি সতর্কবাণী কৰিছিল৷ ৰাজধানী পিয়ংয়াঙত এপেকেট কফীৰ মূল্য এতিয়া ১০০ ডলাৰ৷ অর্থাৎ ভাৰতীয় মুদ্রাৰ হিচাপত এতিয়া এপেকেট কফীৰ মূল্য প্রায় ৭,৩৮১ টকা৷ সেইদৰে সৰু ব্লেক টীৰ এটা পেকেটৰ মূল্য ৭০ ডলাৰ৷ অর্থাৎ প্রায় ৫,১৬৭ টকা৷ এক কিলোগ্রাম কলৰ মূল্য ৪৫ ডলাৰ৷ অভাৱনীয় এই মূল্যবৃদ্ধিয়ে উত্তৰ কোৰিয়াত কিমৰ শাসনলৈ পতন মাতি আনিব বুলি বিভিন্ন মহলে ধাৰণা কৰিছে৷