নিয়মীয়া বাৰ্তা, ৫ জুলাই: ছুপাৰষ্টাৰ লি’নেল মেছিৰ চমকৰ সহায়ত আর্জেণ্টিনাই কোপা আমেৰিকা ফুটবলৰ ছেমিফাইনেলত স্থান সুৰক্ষিত কৰিছে৷ আজি পুৱতি নিশা অনুষ্ঠিত কোৱার্টাৰ ফাইনেলত তাৰকাসমৃদ্ধ দলটোৱে ইকুৱেডৰক ৩–০ গ’লত পৰাস্ত কৰিবলৈ সক্ষম হয়৷ আৰম্ভণিৰে পৰা আক্রমণাত্মক খেল প্রদর্শন কৰি আর্জেণ্টিনাই ৪০ মিনিটত প্রথমটো সফলতা লাভ কৰে৷ ৰ’ড্রিগো ডি পলে প্রথম অর্ধলৈ ৫ মিনিট বাকী থকা অৱস্থাত ইকুৱেডৰৰ ৰক্ষণবেহু ভেদ কৰি আর্জেণ্টিনাক অগ্রগতি দিবলৈ সক্ষম হয়৷ ইয়াৰ পূর্বে মেছিয়ে এটা সুৱর্ণ সুযোগ অথলে নিয়ায় যদিও ৰ’ড্রিগোক গ’ল কৰাত তেওঁ সহযোগিতা আগবঢ়ায়৷ প্রথম অর্ধৰ অগ্রগতিৰে আর্জেণ্টিনা দ্বিতীয়ার্ধতো আত্মবিশ্বাসেৰে খেলপথাৰত নামে৷ ইকুৱেডৰক উপর্যুপৰি চাপত ৰাখি দলটোৱে ৮৪ মিনিটত দ্বিতীয়টো গ’ল কৰে৷ লাটাৰো মার্টিনেজে আর্জেণ্টিনাক দ্বিতীয়টো অগ্রগতি দিয়ে৷ এই গ’লটো কৰাৰ সময়তো মেছিয়ে মার্টিনেজক সহযোগিতা আগবঢ়ায়৷ দুটাকৈ গ’লত সহযোগিতা আগবঢ়াই আর্জেণ্টিনাৰ জয় সহজ কৰি তোলাত মেছিয়ে ৯৩ মিনিটত এটা দৃষ্টিনন্দন ফ্রী কিকৰ সহায়ত গ’ল কৰি পুনৰ ফুটবল অনুৰাগীৰ হূদয় জয় কৰে৷ উল্লেখ্য যে আর্জেণ্টিনাৰ হৈ এয়া তেওঁৰ ৭৬সংখ্যক গ’ল৷ ক্রমাগত ১৭খন মেচত অপৰাজিত হৈ থকা আর্জেণ্টিনা ছেমিফাইনেলত শক্তিশালী কলম্বিয়াৰ মুখামুখি হ’ব৷
অহা মঙলবাৰে প্রতিযোগিতাৰ দ্বিতীয়খন ছেমিফাইনেলত দল দুটা প্রতিদ্বন্দ্বিতাত নামিব৷ ইফালে আজি পুৱতি নিশা অনুষ্ঠিত আন এখন কোৱার্টাৰ ফাইনেলত কলম্বিয়াই উৰুগুৱেক পেনাল্টীৰ সহায়ত ৪–২ গ’লত পৰাস্ত কৰি ছেমিফাইনেললৈ উন্নীত হৈছে৷ নির্ধাৰিত সময়ত মেচখন গ’লশূন্যভাৱে সামৰণি পৰিছিল৷ ব্রাছিলিয়াত অনুষ্ঠিত মেচখনত কলম্বিয়াৰ গ’লৰক্ষক ডেভিড অ’স্পিনাই দুর্দান্ত প্রদর্শনেৰে দুটাকৈ পেনাল্টী শ্বুটআউট ছেভ কৰি নায়কত পৰিণত হয়৷ তেওঁ উৰুগুৱেৰ জ’ছ মাৰিয়া গামিনেজ আৰু মাটিয়াছ ভিনাৰ শ্বট প্রতিহত কৰি কলম্বিয়ালৈ ৰোমাঞ্চকৰ জয় কঢ়িয়াই আনে৷ উল্লেখ্য যে ২০১৫ আৰু ২০১৯ৰ কোপা আমেৰিকাৰ লগতে ২০১৮ৰ ফিফা বিশ্বকাপত কলম্বিয়াই পেনাল্টীত পৰাস্ত হৈ দুঃখজনক বিদায় মাগিছিল৷