নিয়মীয়া বাৰ্তা ২৬ জুলাইঃ মহামাৰী ক’ভিড–১৯ৰ প্রাদুর্ভাৱৰ মাজত আয়োজিত এইবাৰৰ অলিম্পিকক ক্রীড়ানুৰাগীয়ে যথেষ্ট পৃথক ৰূপত দেখিবলৈ পাইছে৷ খালী ষ্টেডিয়ামত দর্শকৰ হর্ষোল্লাস অবিহনে অনুষ্ঠিত মেচসমূহত খেলুৱৈসকলৰ বাহিৰে আন সকলোকে মাস্ক পৰিধান কৰি থকা দেখিবলৈ পোৱা গৈছে৷ মেচ সমাপ্ত হোৱাৰ পিছতে খেলুৱৈসকলৰ মুখমণ্ডলো ঢ়াকি পেলায় ভিন্নৰঙী মাস্কে৷ আনকি পদক গ্রহণৰ সময়তো খেলুৱৈসকলে মুখমণ্ডল উলিয়াই সুখানুভূতি প্রকাশ কৰিব নোৱাৰে৷ মাস্ক পিন্ধিয়ে তেওঁলোকে অলিম্পিকৰ প’ডিয়ামত পদক গ্রহণ কৰা দেখিবলৈ পোৱা গৈছিল
যদিও আন্তঃৰাষ্ট্রীয় অলিম্পিক কমিটীয়ে এই নিয়মৰ কিছু সংশোধন ঘটাইছে৷ এই অনুসৰি খেলুৱৈসকলে অলিম্পিকৰ প’ডিয়ামত ৩০ ছেকেণ্ডৰ বাবে মুখমণ্ডলৰ পৰা মাস্ক আঁতৰাই হাস্যবদনে ফটো ছেছনত অংশ ল’ব পাৰিব৷ খেলুৱৈসকলে যাতে অলিম্পিকৰ পদক জয়ৰ পিছত ক্রীড়া কেৰিয়াৰৰ সবাতোকৈ স্মৰণীয় মুহূর্তৰ সুখানুভূতি প্রকাশ কৰিব পাৰে তাৰ প্রতি লক্ষ্য ৰাখি আন্তঃৰাষ্ট্রীয় অলিম্পিক কমিটীয়ে ৩০ ছেকেণ্ডৰ বাবে মাস্ক আঁতৰোৱাৰ অনুমতি দিছে৷ উল্লেখ্য যে টকি’ত শেহতীয়াকৈ বৃদ্ধি পোৱা ক’ভিড–১৯ৰ সংক্রমণৰ প্রতি লক্ষ্য ৰাখি আন্তঃৰাষ্ট্রীয় অলিম্পিক কমিটীয়ে টকি’ অলিম্পিকত অংশ লোৱা সকলো এথলিট, প্রশিক্ষক আৰু দলীয় বিষয়ববীয়াই মাস্ক পৰিধান কৰাটো বাধ্যতামূলক কৰিছিল৷