নিয়মীয়া বাৰ্তা ২৯ জুলাইঃ চাইবাৰ অপৰাধী চক্রই বিভিন্ন কৌশলেৰে বেংকৰ গ্রাহকৰ পৰা ধন লুট কৰি অহা ঘটনা সংঘটিত হৈ আহিছে৷ চাইবাৰ অপৰাধী চক্রটোৰ কবলত পৰিল গুৱাহাটীৰ অমৰেন্দ্র কলিতা নামৰ এজন লোক৷ ভুক্তভোগী কলিতাৰ পাণবজাৰ এছ বি আই শাখাৰ একাউণ্টৰ পৰা আজি চাইবাৰ অপৰাধীয়ে ১.১০ লাখ টকা হৰলুকী কৰে৷ ঘটনা সন্দর্ভত ভুক্তভোগী অমৰেন্দ্র কলিতাই পাণবজাৰ থানাত এখন এজাহাৰ দাখিল কৰে৷
আৰক্ষীয়ে জানিবলৈ দিয়া মতে, বুধবাৰে পুৱা কলিতালৈ এজন লোকে ফোন কৰি কে ৱাই চি আপডেট কৰিবলৈ কয় আৰু এটা অ’টিপি তেওঁৰ ম’বাইল নম্বৰলৈ পঠিয়ায়৷ অ’টিপিটো কলিতাই লোকজনক দিয়াৰ কিছু সময়ৰ পাছতে ২০ হাজাৰ টকা উলিয়াই নিয়াৰ এটা মেছেজ আহে৷ লগে লগে বেংকলৈ ফোন কৰি বিষয়টো অৱগত কৰাত কলিতাৰ নেট বেংকিং বন্ধ কৰি দিয়ে৷ ইয়াৰ পাছতে পুনৰ কলিতালৈ এটা ফোন আহে৷ নেট বেংকিং বন্ধ কৰোঁতে ভুল হ’ল বুলি কৈ পুনৰ এটা অ’টিপি পঠিয়ায়৷ অ’টিপিটো কলিতাই লোকজনক দিয়াৰ পাছতে চাইবাৰ অপৰাধী চক্রটোৱে ৩৫ আৰু ৫৫ হাজাৰ টকা উলিয়াই নিয়ে৷ ইফালে বেংক কর্তৃপক্ষই পেটিএমৰ জৰিয়তে অপৰাধী চক্রটোৱে কলিতাৰ ধনৰাশিৰে সামগ্রী ক্রয় কৰা বুলি জনাইছে৷