নিয়মীয়া বাৰ্তা, ৪ ছেপ্টেম্বৰঃ বৃহস্পতিবাৰে হূদৰোগত আক্রান্ত হৈ প্রাণ হেৰুওৱা বলীউডৰ অভিনেতা তথা বিগ বছ–১৩ৰ বিজয়ী সিদ্ধার্থ শুক্লাৰ শুকুৰবাৰে বিয়লি অ’ছিৱাৰা সমাধিক্ষেত্রত শেষকৃত্য সম্পন্ন কৰা হয়৷ অভিনেতাগৰাকীৰ শেষকৃত্যত উপস্থিত থাকে পৰিয়ালৰ সকলো সদস্য তথা বন্ধু–বান্ধৱসকল৷
লক্ষণীয়ভাৱে পুত্রশোকত ভাগি পৰা মাতৃ ৰীতা শুক্লাও শুকুৰবাৰে সিদ্ধার্থৰ শেষকৃত্যত উপস্থিত থাকে৷ সেইদৰে অভিনেতাগৰাকীৰ ভগ্ণী তথা প্রেয়সী শ্বেহনাজ গীলেও সমাধিক্ষেত্রত উপস্থিত থাকি অভিনেতাগৰাকীক অন্তিম বিদায় জনায়৷ শুকুৰবাৰে শেষকৃত্যৰ সময়ত কান্দোনত ভাগি পৰে প্রেয়সী শ্বেহনাজ গীল৷
ইফালে, জনপ্রিয় অভিনেতাগৰাকীক অন্তিম শ্রদ্ধা জ্ঞাপন কৰিবলৈ শুকুৰবাৰে সমাধিক্ষেত্রত উপস্থিত হয় জয় ভানুছালি, মাহী বিজ, আলী গণি, অসীম ৰিয়াজ, ৰাহুল মহাজন, বিকাশ গুপ্তা, অভিনৱ শুক্লা, কৰণবীৰ ব’হৰা, শ্বেফালি জাৰিৱালা আৰু দর্শন ৰাভাল৷