নিয়মীয়া বাৰ্তা, ১০ জানুৱাৰীঃ দেশৰ যুৱপ্রজন্মক ক্রীড়াৰ মাধ্যমেৰে উন্নতিৰ শিখৰলৈ লৈ যোৱাৰ লক্ষ্যৰে কেন্দ্রীয় চৰকাৰে আৰম্ভ কৰা খেলো ইণ্ডিয়া য়ুথ গেমছ গুৱাহাটীত আজি আনুষ্ঠানিকভাৱে উদ্বোধন হ’ব যদিও প্রতিযোগিতাখনৰ কাবাদী আৰু জিমনাষ্টিকছ ইভেণ্টৰ খেলসমূহ বৃহস্পতিবাৰৰ পৰা অনুষ্ঠিত হৈছে ৷
টেপেছিয়াস্থিত লক্ষ্মীবাই ৰাষ্ট্রীয় শাৰীৰিক শিক্ষা প্রতিষ্ঠানত কাবাদীৰ মেচসমূহ অনুষ্ঠিত হোৱাৰ বিপৰীতে দিছপুৰস্থিত ভোগেশ্বৰী ফুকননী ইনড’ৰ ষ্টেডিয়ামত জিমনাষ্টিকছ অনুষ্ঠিত হৈছে৷
কাবাদীত ১৭ বছৰ অনূর্ধ্ব ল’ৰা শাখাৰ প্রথমখন মেচত ঘৰুৱা দল অসমে পৰাজয়ৰ সন্মুখীন হয়৷ হাৰিয়ানাই অসমক ৪৫ পইণ্টৰ ব্যৱধানত পৰাস্ত কৰে৷
ইফালে, ২১ বছৰ অনূর্ধ্ব ল’ৰাৰ শাখাতো অসম ব্যর্থ হয়৷ চণ্ডীগড়ে অসমৰ বিৰুদ্ধে ২১ পইণ্টত জয় সাব্যস্ত কৰে৷
ছোৱালী শাখাতো অসমে প্রত্যাশিত সাফল্য অর্জন কৰিবলৈ সক্ষম নহ’ল৷ ২১ বছৰ অনূর্ধ্বৰ ছোৱালী শাখাত হিমাচল প্রদেশে অসমক ২০ পইণ্টত পৰাস্ত কৰে৷
উল্লেখ্য যে প্রতিযোগিতাখনত দেশৰ ভিন্ন প্রান্তৰ মুঠ ৬,৫০০গৰাকী এথলীটে মুঠ ২০টা ক্রীড়া ইভেণ্টত প্রতিদ্বন্দ্বিতা আগবঢ়াব৷