নিয়মীয়া বাৰ্তা, ২২ ছেপ্টেম্বৰঃ সম্প্রতি ইংলেণ্ড ভ্রমণৰত নিউজিলেণ্ডৰ মহিলা ক্রিকেট দলটোৱে বোমাৰে উৰুৱাই দিয়াৰ ভাবুকি লাভ কৰিছে৷ নিউজিলেণ্ড দলটোলৈ এই ভাবুকি অহাৰ পিছতে দলটোৰ খেলুৱৈসকলৰ নিৰাপত্তা ব্যৱস্থা অধিক কটকটীয়া কৰি তুলিছে ইংলেণ্ড এণ্ড ৱেলছ ক্রিকেট ব’র্ডে৷ আজি লেইচেষ্টাৰত ঘৰুৱা দল ইংলেণ্ডৰ বিপক্ষে খেলা তৃতীয়খন এদিনীয়াৰ প্রাকমুহূর্তত নিউজিলেণ্ড দলটোক বোমাৰে উৰুৱাই দিয়াৰ এক ভাবুকি আহিছিল৷
অৱশ্যে নিউজিলেণ্ড ক্রিকেট ব’র্ডে এই ভাবুকিক বিশেষ গুৰুত্ব নিদিলে আৰু ইংলেণ্ডৰে তৃতীয়খন এদিনীয়া মেচত সময়মতে ভাগ লয়৷ উল্লেখ্য যে নিৰাপত্তাজনিত কাৰণত নিউজিলেণ্ডৰ পুৰুষ দলটোৱে পাকিস্তান ভ্রমণ আধাতে সামৰিছিল৷ দলটোৱে এখনো মেচত অংশ নোলোৱাকৈ পাকিস্তানৰ পৰা উভতিছিল৷