নিয়মীয়া বাৰ্তা, ২৪ ছেপ্টেম্বৰঃ কর্ণাটকৰ ৰাজধানী বাংগালুৰুৰ চমাৰাজপেটৰ এক পৰিবহণ কোম্পানীৰ গুদামত সংঘটিত বিস্ফোৰণত তিনিগৰাকী লোক নিহত হোৱাৰ উপৰি আন এজন গুৰুতৰভাৱে আহত হৈছে৷ তাৎক্ষণিকভাৱে আৰক্ষীৰ বোমা নিষ্ক্রিয়কৰণ গোট আৰু স্নিফাৰ ডগ ঘটনাস্থলীত মোতায়েন কৰা হয়৷
আৰক্ষীয়ে সদৰী কৰা অনুসৰি ঘটনাস্থলীৰ পৰা উদ্ধাৰ হৈছে আতচবাজী৷ আৰক্ষী বিষয়া হৰিশ পাণ্ডেই সন্দেহ কৰা অনুসৰি আতচবাজীৰ বিস্ফোৰণৰ ফলতে তিনিগৰাকী লোক নিহত হোৱা বুলি সন্দেহ কৰা হৈছে৷ লক্ষণীয়ভাৱে গুদামটোৰ ভিতৰত প্রায় ৮০টা আতচবাজীৰ বাকচ থোৱা বুলি আৰক্ষী বিষয়া পাণ্ডেই উল্লেখ কৰিছে৷
ইয়াৰে এটা বক্সত বিস্ফোৰণ সংঘটিত হোৱাৰ ফলত গুদামটোত থকা তিনিজন লোক নিহত হোৱাৰ উপৰি আন এজন আহত হয়৷ বিস্ফোৰণৰ ঘটনাক লৈ সমগ্র চহৰখনত উত্তেজনা সৃষ্টি হোৱা বুলিও আৰক্ষীয়ে সংবাদ মাধ্যমক জনাইছে৷