নিয়মীয়া বার্তা, ২৪ জানুুৱাৰীঃ অগ্নিকাণ্ডৰ সংবাদ পায়েই দুর্যোগপীড়িতজনক তাৎক্ষণিকভাৱে সহায়ৰ হাত আগবঢ়োৱাৰ পৰিৱর্তে ঘটনাস্থলীত পলমকৈ উপস্থিত হোৱাটো যেন অগ্নিনির্বাপক বাহিনীৰ ‘অভ্যাস’ত পৰিণত হৈছে৷ ইয়াৰ বাবে অগ্নিনির্বাপক বাহিনীৰ লোক জনৰোষৰ সন্মুখীন হ’বলগীয়া হোৱাৰ একাধিক ঘটনা ঘটিছে বিগত সময়ছোৱাত৷ তাৰ পাছতো কিন্তু ভুলৰ শুধৰণি নহ’ল৷ কালি পুনৰ একে অভিযোগেই উত্থাপন হ’ল অগ্নিনির্বাপক বাহিনীৰ বিৰুদ্ধে৷
বেলতলাৰ ৱায়াৰলেছৰ বশিষ্ঠপুৰৰ ১নং উপপথত সংঘটিত হূদয়বিদাৰক অগ্নিকাণ্ডৰ খবৰ স্থানীয় একাংশই ফোনযোগে দিনৰ প্রায় ১ বজাতে দিছিল৷ কিন্তু ইয়াৰ ৩০–৪৫ মিনিট পাছতহে ঘটনাস্থলীত অগ্নিনির্বাপক বাহিনীৰ গাড়ী উপস্থিত হোৱাৰ অভিযোগ উঠিছে৷
অভিযোগ মতে, অকল পলমকৈ উপস্থিত হোৱাই নহয়, প্রথম গাড়ীত পানী প্রায় নাছিলেই৷ অগ্ণি নির্বাপনৰ বাবে দুই–তিনি মিনিট পানী ছটিওৱাৰ পাছতে খালী হৈ গৈছিল গাড়ীখন৷ অগ্ণিনির্বাপক বাহিনীৰ এনে দায়িত্বজ্ঞানহীনতাৰ বাবেই দুই কণমানি ঈশান আৰু ইৱনৰ প্রাণৰক্ষা কৰিব পৰা নগ’ল বুলি ঘটনাস্থলীত উপস্থিত বিভিন্নজনে দুখেৰে মন্তব্য কৰে৷
স্থানীয় এজনে জানিবলৈ দিয়া মতে, তুষাৰ গোস্বামীৰ ঘৰৰ প্রথম মহলাত জুই দেখি অগ্নিনির্বাপক বাহিনী আৰু আৰক্ষীক খবৰ দিয়াৰ সমান্তৰালভাৱে জুই নির্বাপনৰ চেষ্টা কৰিছিল৷ বিশেষকৈ জুইৰ মাজত আবদ্ধ দুই কণমানি ভাতৃক কেনেদৰে উদ্ধাৰ কৰিব পাৰি, তাৰো চেষ্টা চলাইছিল৷ কিন্তু ইতিমধ্যে জুইৰ লেলিহান শিখাই সমগ্র প্রথম মহলাটো ছানি ধৰে৷ এনে অৱস্থাত সকলোৱে অসহায় হৈ অগ্ণিনির্বাপক বাহিনীলৈ অপেক্ষা কৰে৷ পিছে অগ্নিনির্বাপক বাহিনী পলমকৈহে উপস্থিত হয়৷ তাতে আকৌ প্রথমখন গাড়ী আছিল প্রায় খালী৷ পাছত অগ্নিনির্বাপক বাহিনীৰ মুঠ ৮খন গাড়ীয়ে জুই নির্বাপন কৰিবলৈ সক্ষম হয় যদিও তেতিয়ালৈ জীৱনৰ জুয়েই নির্বাপিত হৈছিল ঈশান–ইৱনৰ৷ অৱশ্যে ঘটনাস্থলীত পলমকৈ উপস্থিত হোৱা বুলি স্থানীয় ৰাইজে উত্থাপন কৰা অভিযোগ নস্যাৎ কৰিছে অগ্নিনির্বাপক বাহিনীৰ এজন শীর্ষ বিষয়াই৷ তেওঁ দাবী কৰা মতে, দিনৰ প্রায় ১.১৩ বজাত বশিষ্ঠপুৰ ১নং উপপথত জুই লগাৰ খবৰ লাভ কৰিছিল৷ তাৰ পাছতে ঘটনাস্থলীত ৩খন গাড়ী উপস্থিত হৈ অগ্নি নির্বাপনৰ চেষ্টা চলায়৷ ইফালে বশিষ্ঠপুৰ ১নং উপপথটো ঠেক হোৱা বাবেও একে সময়তে অগ্ণিনির্বাপক বাহিনীৰ এখনতকৈ অধিক গাড়ী ঘটনাস্থলীলৈ অহাৰ ক্ষেত্রত অসুবিধা হোৱা বুলি স্থানীয় আন একাংশই প্রকাশ কৰে৷ সম্ভাব্য দুর্যোগৰ প্রতি লক্ষ্য ৰাখি পথ আৰু উপপথসমূহ বহল কৰাৰ সজাগতা চলাই অহা হৈছে৷ কিন্তু সেই সজাগতা যে অভিযানতে সীমাবদ্ধ আছে, সেই কথা বাস্তৱত প্রকট হৈ পৰিল৷