নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

সমুজ্জ্বলৰ মতৰ বিৰোধিতা লুৰিণজ্যোতিৰঃ আৱেগিক পৰিৱেশত আছুৰ পৰা বিদায় ঘোষণা সমুজ্জ্বল ভট্টাচার্যৰ

নিয়মীয়া বাৰ্তা, ২১ নৱেম্বৰঃ আছু ৰাজনৈতিক নে অৰাজনৈতিক? আছুৰ ৰাজনৈতিক দর্শন আছে নে ই এটা অৰাজনৈতিক সংগঠন? ইয়াকে লৈ কালি সদৌ অসম ছাত্র সন্থাৰ দুলীয়াজান অধিৱেশনৰ প্রতিনিধি সভাত তীব্র বিতর্কৰ সৃষ্টি হয়৷ সংগঠনটোৰ মুখ্য উপদেষ্টা ড০ সমুজ্জ্বল ভট্টাচার্য আৰু সাধাৰণ সম্পাদক লুৰিণজ্যোতি গগৈয়ে বিষয়টোক লৈ থকা নিজৰ নিজৰ মতপার্থক্য যুক্তিৰে দাঙি ধৰে৷

দুলীয়াজানৰ ছলাকটকী ৰাজহুৱা খেলপথাৰত অনুষ্ঠিত হৈ থকা আছুৰ সপ্তদশ অধিৱেশনত কালি আছিল দ্বিতীয়খন প্রতিনিধি সভা৷ এই সভা উদ্বোধন কৰি সংগঠনটোৰ মুখ্য উপদেষ্টা ড০ সমুজ্জ্বল ভট্টাচার্যই কয় যে অসমৰ মাটিত সদৌ অসম ছাত্র সন্থা সদায় শক্তিশালী হৈ থাকিব লাগিব আৰু ইয়াৰ অৰাজনৈতিক চৰিত্র অক্ষুণ্ণ থাকিব লাগিব৷

অসমৰ ছাত্র সমাজ সদায় অৰাজনৈতিকভাৱে সংগঠিত হৈ আহিছে৷ লক্ষ্মীনাথ বেজবৰুৱাই অসম ছাত্র সন্মিলন গঠন কৰাৰ পাছৰে পৰা অসমৰ ছাত্র সংগঠনে দীঘলীয়া পৰিক্রমা অতিক্রম কৰিছে৷ স্বাধীনতা আন্দোলনতো অসমৰ ছাত্র সমাজে সক্রিয় অংশগ্রহণ কৰিছিল৷ তেতিয়াও এটা বিতর্ক হৈছিল যে অসমৰ ছাত্রসকল জাতীয় কংগ্রেছৰ লগত চামিল হ’ব নে অৰাজনৈতিকভাৱে সংগঠিত হৈ থাকিব৷

সেই সময়ত অসমৰ ছাত্র সমাজে অৰাজনৈতিকভাৱে সংগঠিত হোৱাৰ পক্ষত মতামত দিলে৷ গতিকে সেই পৰিক্রমাৰ এটা অংশ সদৌ অসম ছাত্র সন্থাও সদায় অৰাজনৈতিক হৈ থাকিব লাগিব৷ আছুৰ অৰাজনৈতিক চৰিত্র অক্ষুণ্ণ থাকিবই লাগিব৷ তেওঁ লগতে কয় যে স্বাধীনতা সংগ্রামী চন্দ্রনাথ শর্মাই অসমৰ ছাত্র–যুৱ সমাজৰ শক্তি সন্দর্ভত কৈছিল যে আমাৰ ইয়াত পশ্চিমৰ বতাহৰ লগত ফেৰ মাৰিব পৰা পূবৰ বতাহ আছে৷

এই পূবৰ বতাহ অসমৰ ছাত্র আৰু যুৱ শক্তি৷ সদৌ অসম ছাত্র সন্থাকো পূবৰ বতাহ বুলি অভিহিত কৰে ড০ সমুজ্জ্বল ভট্টাচার্যই৷ তেওঁ নিজৰ উদ্বোধনী ভাষণত অসমৰ শিক্ষা আৰু সমাজ জীৱনৰ বিভিন্ন সমস্যাৰ ওপৰত আলোকপাত কৰি আছুৰ সদস্যসকলক এটা পণ লৈ আগবাঢ়ি যাবলৈ আহ্বান জনায়৷

সেই পণ হ’ল– আমি জিলিকিম, অসমক জিলিকাম, আছুক জিলিকাম৷ তদুপৰি নিৰংহকাৰী মন লৈ, ৰাইজৰ অভিভাৱকত্বত কাম কৰি যাবলৈও সংগঠনটোৰ কর্মীসকলক মুখ্য উপদেষ্টাগৰাকীয়ে পৰামর্শ দিয়ে৷ ইপিনে, ড০ সমুজ্জ্বল ভট্টাচার্যৰ উদ্বোধনী ভাষণৰ পিছতে আছুৰ দৃষ্টিভংগী ব্যাখ্যা কৰে সাধাৰণ সম্পাদক লুৰিণজ্যোতি গগৈয়ে৷

নিজৰ দীঘলীয়া ভাষণত তেওঁ অসমৰ জ্বলন্ত সামাজিক অৰু শৈক্ষিক সমস্যাসমূহৰ ওপৰত আলোকপাত কৰাৰ লগতে আছুৰ ৰাজনৈতিক দর্শন সম্পর্কেও বহল ব্যাখ্যা আগবঢ়ায়৷ তেওঁ কয় যে আছু এটা সদায় অৰাজনৈতিক সংগঠন৷ কিন্তু অৰাজনৈতিক মানে এ পলিটিকেলহে, নন–পলিটিকেল নহয়৷ এনজি’, ক্লাব আদি সংগঠনবোৰ অৰাজনৈতিক হ’ব পাৰে, কিন্তু এটা জাতীয় সংগঠন হিচাপে আছু কেতিয়াও নন–পলিটিকেল হ’ব নোৱাৰে৷

আছুৰ ৰাজনৈতিক দৃষ্টিভংগী থাকিবই৷ আছুক নন–পলিটিকেল বুলি কোৱাটো এটা ভুৱা কথা৷ সদৌ অসম ছাত্র সন্থাৰ সংবিধানৰ নির্দিষ্ট দফাৰ উদ্ধৃতি দি তেওঁ কয় যে সংগঠনটোৰ সংবিধানত উল্লেখ আছে যে সামাজিক ন্যায় আৰু সমতা প্রতিষ্ঠা আছুৰ মূল লক্ষ্য৷ সংবিধানত সকলো শোষণ, নিষ্পেষণৰ বিৰুদ্ধে সংগ্রাম কৰাৰ কথা আছে৷ ৰাজনৈতিক সচেতনতা বৃদ্ধিৰ কথা কোৱা হৈছে৷ সমাজতন্ত্র প্রতিষ্ঠাৰ লক্ষ্য সংবিধানে নির্ধাৰণ কৰি দিছে৷

এই প্রতিটো বিষয়েই ৰাজনৈতিক৷ এটা ৰাষ্ট্র ব্যৱস্থাত কোনো মানুহ অৰাজনৈতিক হ’ব নোৱাৰে৷ সদৌ অসম ছাত্র সন্থায়ো সদায় ৰাজনৈতিক প্রশ্ণই উত্থাপন কৰি আহিছে৷ কিন্তু আছু কোনো ৰাজনৈতিক দলৰ বহতীয়া কেতিয়াও নহয়, কোনো দলৰ গণ্ডীত থাকি আছুৱে কাম নকৰে৷ আছুৰ গাত হাজাৰ চেষ্টা কৰিলেও এই আঁচোৰ পৰিবলৈ দিয়া নহয়৷ সংগঠনটোৰ সাধাৰণ সম্পাদকগৰাকীয়ে লগতে আন এক তাৎপর্যপূর্ণ মন্তব্য কৰি কয় যে সকলো মানুহৰে কিছুমান কাম কৰাৰ এটা নির্দিষ্ট সময় থাকে৷ জীৱন চক্রত নিৰূপণ কৰা থাকে যে কোনটো বয়সত মানুহে কোনটো কাম কৰিব৷

শিক্ষা এটা নিৰৱচ্ছিন্ন প্রক্রিয়া হ’লেও কোনেও নিজকে আজীৱন ছাত্র বুলি ক’ব নোৱাৰে৷ ভাৰতীয় দর্শনেও জীৱনৰ বেলেগ বেলেগ স্তৰ নিৰূপণ কৰি দিছে৷ গতিকে সময় আহিলে পুৰণিৰ প্রতি মানুহে কিছুমান মায়া এৰিবই লাগিব৷ পুৰণি যাব, নতুন আহিব– এয়াই হৈছে প্রকৃতিৰ স্বাভাৱিক নিয়ম৷ কোনো মানুহ সৎ নে অসৎ সেয়া নিৰূপণ কৰিব সময়ে৷ সত্য আৰু সততাৰ বুৰঞ্জী সময়ে লিখিব৷ মানুহৰ বুৰঞ্জীত নিশ্চয় ত্রুটি–বিচ্যুতি থাকিব৷ গতিকে এই মূল্যায়নৰ দায়িত্ব সময়ৰ হাতত এৰি দিব লাগে আৰু নতুনসকলক সপোন সাকাৰ কৰাৰ বাট মুকলি কৰি দিব লাগে৷

এইদৰে আজি ৰাজ্যৰ বিভিন্ন প্রান্তৰ পৰা অহা প্রায় ৫ হাজাৰ প্রতিনিধিৰ আগত ছাত্র সন্থাৰ মুখ্য উপদেষ্টা ড০ সমুজ্জ্বল ভট্টাচার্য আৰু সাধাৰণ সম্পাদক লুৰিণজ্যোতি গগৈৰ আছুৰ ৰাজনৈতিক আৰু অৰাজনৈতিক চৰিত্র সন্দর্ভত থকা মতভেদ স্পষ্ট হৈ পৰে৷ উল্লেখ্য যে আজিৰ প্রতিনিধি সভা উদ্বোধন কৰি ড০ সমুজ্জ্বল ভট্টাচার্যই নলিনীবালা দেৱীৰ ‘ধূলিকনা মই’ শীর্ষক কবিতাটো আবৃত্তি কৰি দুলীয়াজান অধিৱেশনতে আছুৰ পৰা অৱসৰ ল’ব বুলি ঘোষণা কৰে৷

চকুপানী মচি আবেগিকভাৱে ড০ ভট্টাচার্যই এই ঘোষণা কৰাৰ পিছতেই অধিৱেশনস্থলীত উপস্থিত প্রতিনিধিসকলৰ মাজত অবর্ণনীয় পৰিস্থিতিৰ সৃষ্টি হয়৷ আবেগিক হৈ পৰে সভাস্থলীত উপস্থিত প্রতিনিধিবর্গও৷ তেওঁৰ এই ঘোষণাৰ পিছতে আছুৰ প্রতিনিধিসকলে ‘সমুজ্জ্বল ভট্টাচার্য জিন্দাবাদ’ ধ্বনি দি তেওঁক আছু এৰি নাযাবলৈ অনুৰোধ জনায়৷ তাৎপর্যপূর্ণভাৱে, ড০ ভট্টাচার্যই ভাষণ দি থকা অৱস্থাত মঞ্চৰ পাছফালে উপস্থিত থাকি হাজোৰ কালীসাধক নগেন দাসে মন্ত্রোচ্চাৰণ কৰি আছিল৷ বিষয়টোক লৈ অধিৱেশনস্থলীত ব্যাপক চর্চা হয়৷ সন্ধিয়াৰ ভাগত অনুষ্ঠিত প্রতিনিধি সভাৰ দ্বিতীয় ভাগত সাধাৰণ সম্পাদক লুৰিণজ্যোতি গগৈয়ে সম্পাদকীয় প্রতিবেদন দাখিল কৰাৰ লগতে বিত্তীয় প্রতিবেদনো উত্থাপন কৰে৷

ইয়াৰ পিছতে কার্যনির্বাহক সভাত গ্রহণ কৰা প্রস্তাৱসমূহ প্রতিনিধি সভাৰ অনুমোদনৰ বাবে উত্থাপন কৰা হয়৷ মূল প্রস্তাৱসমূহৰ ভিতৰত আছে, আছু সদস্যৰ বয়সৰ ঊর্ধ্বসীমা ৪০ বছৰ নির্ধাৰণ, ৰাজ্যিক কার্যনির্বাহকৰ নূ্যনতম শিক্ষাগত অর্হতা স্নাতক নিৰূপণ আৰু কেন্দ্রীয় কার্যনির্বাহকৰ সর্বোচ্চ কার্যকাল ৩ বছৰ নির্ধাৰণ৷ এই প্রস্তাৱসমূহ অনুমোদিত হ’লেও এই অধিৱেশনত গঠন হ’বলগীয়া ৰাজ্যিক কার্যনির্বাহকৰ ক্ষেত্রত এয়া প্রযোজ্য নহ’ব৷ পৰৱর্তী কার্যনির্বাহকৰ পৰাহে নতুন সংশোধনীসমূহ কার্যকৰী হ’ব৷ ইফালে, আছুৰ ৰাজনৈতিক–ৰাজনৈত্ ভূমিকাক লৈ শীর্ষ নেতৃত্বৰ মাজত থকা গভীৰ মতভেদ পোহৰলৈ অহাৰ পিছত সংগঠনটোৰ নতুন নেতৃত্বলৈ কোন আহে, তাক লৈও উৎকণ্ঠাৰ সৃষ্টি হৈছে৷ আজি মুকলি সভাৰ অধিৱেশনৰ পিছত অনুষ্ঠিত হ’বলগীয়া বিষয়বাছনি সভাতে এই আটাইবোৰ বিষয় স্পষ্ট হৈ পৰিব৷

You might also like