তদন্ত অন্তিম পৰ্যায়ত : জুবিন গাৰ্গ মৃত্যুকাণ্ডৰ চার্জশ্বীট দাখিলৰ দিন ঘোষণা
শ্যামকানু মহন্ত, সিদ্ধার্থ শৰ্মা, সন্দীপন গাৰ্গ, পৰেশ বৈশ্য আৰু নন্দেশ্বৰ বৰা বাক্সা জিলা কাৰাগাৰত আৰু শেখৰ গোস্বামী আৰু অমৃতপ্ৰভা মহন্ত হাফলং কাৰাগাৰত আছে
অসমৰ সাংস্কৃতিক হাৰ্টথ্ৰব জুবিন গাৰ্গৰ দুৰ্ঘটনাজনিত মৃত্যুকাণ্ডত তদন্তৰ এক নতুন আপডেট আহিছে। অসম অপৰাধ অনুসন্ধান বিভাগ (CID)-এ সদৰী কৰিছে যে ১২ ডিচেম্বৰত চার্জশ্বীট দাখিল কৰা হ’ব, যি নিৰ্ধাৰিত শেষ তাৰিখ ১৮ ডিচেম্বৰৰ আগতেই।
সংবাদ মাধ্যমক সম্বোধন কৰি আৰক্ষী বিশেষ মহানির্দেশক (CID) মুন্না প্ৰসাদ গুপ্তাই কয়, “তদন্ত প্ৰায় সম্পূৰ্ণ হৈছে। সকলো তথ্য চার্জশ্বীটত স্পষ্টভাৱে উল্লেখ কৰা হ’ব।” তেওঁ লগতে কয় যে তদন্ত দলে হাতত লোৱা সকলো দিশেই এই চার্জশ্বীটত সবিস্তাৰে ধৰা পৰিব।
তেওঁ সদৰী কৰে যে এতিয়ালৈকে সাতজনক গ্ৰেপ্তাৰ কৰা হৈছে আৰু ৩০০ৰো অধিক সাক্ষীক জেৰা কৰা হৈছে।
“কর্টত চার্জশ্বীট দাখিল হ’লেই সকলো তথ্য প্ৰকাশ হ’ব” বুলি গুপ্তাই জনায়। CID এইক্ষেত্ৰত সঠিকতা আৰু স্বচ্ছতা নিশ্চিত কৰিবলৈ অত্যন্ত গুৰুত্বসহকাৰে কাম কৰি আছে বুলি তেওঁ উল্লেখ কৰে।
উল্লেখ্য যে ৪ ডিচেম্বৰত মুখ্যমন্ত্রী ড০ হিমন্ত বিশ্ব শৰ্মাই ইতিমধ্যেই জানাইছিল যে বিশেষ অনুসন্ধান দলে (SIT) নিৰ্ধাৰিত সময়ৰ আগতেই তদন্ত সম্পূৰ্ণ কৰি দাখিল কৰিব। তেওঁ ১০ ডিচেম্বৰৰ ভিতৰতে চার্জশ্বীট প্ৰস্তুত হ’ব বুলি আশা প্ৰকাশ কৰিছিল।
এই গোচৰত গ্ৰেপ্তাৰ হোৱা লোকসকলৰ ভিতৰত আছে— Northeast India Festivalৰ সংগঠক শ্যামকানু মহন্ত, জুবিনৰ মেনেজাৰ সিদ্ধার্থ শৰ্মা, সম্পৰ্কীয় ভাতৃ সন্দীপন গাৰ্গ, শেখৰজ্যোতি গোস্বামী, সহঃগায়ক অমৃতপ্ৰভা মহন্ত আৰু তেওঁৰ দুই PSO—পৰেশ বৈশ্য আৰু নন্দেশ্বৰ বৰা। এই সাতজনকেই এতিয়া ন্যায়িক জিম্মাত ৰখা হৈছে আৰু ৩ ডিচেম্বৰত কামৰূপৰ মুখ্য ন্যায়িক দণ্ডাধীশৰ (CJM) সন্মুখত ভার্চুৱেল হাজিৰ কৰোৱাত ১৪ দিনৰ বাবে ৰিমাণ্ড বঢ়াই দিয়া হৈছে।
শ্যামকানু মহন্ত, সিদ্ধার্থ শৰ্মা, সন্দীপন গাৰ্গ, পৰেশ বৈশ্য আৰু নন্দেশ্বৰ বৰা বাক্সা জিলা কাৰাগাৰত আৰু শেখৰ গোস্বামী আৰু অমৃতপ্ৰভা মহন্ত হাফলং কাৰাগাৰত আছে।
২৫ নৱেম্বৰত মুখ্যমন্ত্ৰীয়ে বিধানসভাত এক মন্তব্য কৰি জুবিন গাৰ্গক হত্যা কৰা হৈছে বুলি স্পষ্টকৈ কোৱাত তদন্তই এক নতুন দিশলৈ মোৰ লয়। ইয়াৰ আগতে ঘটনাটো “অৱহেলা” বা “দায়যুক্ত হত্যাকাণ্ড”ৰ দিশেৰে আগবাঢ়িছিল।
উল্লেখ্য, জুবিন গাৰ্গ বছৰ ১৯ ছেপ্টেম্বৰত ছিংগাপুৰত North East India Festival (NEIF)-ৰ চতুর্থ সংস্কৰণত অংশগ্ৰহণ কৰিবলৈ গৈ থকা অৱস্থাতে ৰহস্যজনকভাৱে মৃত্যু হয়।
ইফালে অসমবাসী এতিয়া SITৰ চার্জশ্বীটৰ অপেক্ষাত।
ডিজিটেল ডেস্ক, ৬ ডিচেম্বৰ