অসমলৈ বৃন্দাবনী বস্ত্ৰ : লণ্ডন-ত ব্রিটিছ মিউজিয়ামৰে LOI সম্পাদন মুখ্যমন্ত্ৰীৰ

অসমলৈ অনা হ’ব মহাপুৰুষ গুৰুজনাৰ সৃষ্টি বৃন্দাবনী বস্ত্র৷ লণ্ডনত মুখ্যমন্ত্রী ড০ হিমন্ত বিশ্ব শর্মাৰ উপস্থিতিত ব্রিটিছ মিউজিয়াম কর্তৃপক্ষৰে ইয়াৰ বাবে সম্পাদিত হ’ল লেটাৰ অৱ ইণ্টেণ্ট (এলঅ’আই)৷

উল্লেখ্য যে অসমৰ ঐতিহ্য, অতিকে আপুুৰুগীয়া সম্পদ বৃন্দাবনী বস্ত্র অসমভূমিলৈ অনাৰ বাবে মুখ্যমন্ত্রীৰ উদ্যোগত বিশেষ তৎপৰতা বহন কৰা হৈছিল৷ এই তৎপৰতাৰ অংশস্বৰূপে লণ্ডনত থকা বৃন্দাবনী বস্ত্র অসমলৈ অনাৰ বাবে প্রথমলানি পদক্ষেপ সম্পন্ন হ’ল৷

উল্লেখ্য যে ১৮ মাহৰ বাবে ২০২৭ চনত অসমলৈ আনিব লগা বৃন্দাবনী বস্ত্র প্রদর্শন কৰিবলৈ জিন্দাল গ্রুপে খানাপাৰাত লণ্ডন মিউজিয়াম আর্হিত নির্মাণ কৰিব এক সংগ্রহালয়৷ এই সংগ্রহালয়তে ৰাজ্যবাসীয়ে গুৰুজনাৰ সৃষ্টিক স্বচক্ষে প্রত্যক্ষ কৰিবলৈ সক্ষম হ’ব৷

এলঅ’আই সম্পাদিত কৰি মুখ্যমন্ত্রী ড০ শর্মাই সামাজিক মাধ্যমত এইবুলি উল্লেখ কৰিছে– লণ্ডনৰ ব্রিটিছ সংগ্রহালয় হৈছে বিশ্বৰ এনে এটি বিৰল সংগ্রহালয়, যি ইতিহাসৰ বহু উল্লেখনীয় আৰু স্মৰণীয় সমলৰ সাক্ষ্য বহন কৰি থৈছে৷

ব্রিটিছ মিউজিয়ামত সংগৃহীত মহাপুৰুষ শ্রীমন্ত শংকৰদেৱ গুৰুজনাৰ সৃষ্টি বৃন্দাবনী বস্ত্র অসমলৈ অনাৰ বাবে অসম চৰকাৰ আৰু ব্রিটিছ মিউজিয়ামৰ মাজত লেটাৰ অৱ ইণ্টেণ্ট (এলঅ’আই) স্বাক্ষৰিত হয়৷ অসমৰ ঐতিহ্য, অতিকৈ আপুৰুগীয়া সম্পদ অসমভূমিলৈ আহিব আৰু অসমবাসীয়ে এই পৱিত্র বস্ত্রভাগি দর্শন কৰিব৷

স্থায়ীভাৱে নহ’লেও ব্রিটিছ মিউজিয়ামত থকা এই সম্পদবিধ অসমলৈ বিশেষ কিছু নিয়মৰ মাজেৰেহে অনা হ’ব৷ এই বার্তাই নিশ্চিতকৈ জাতীয় জীৱন তথা ভাৰতবাসীকো গৌৰৱান্বিত কৰিব৷

উল্লেখ্য যে শংকৰদেৱৰ প্রত্যক্ষ নির্দেশনাত বুঢ়া আতাৰ নেতৃত্বত ১২জনীয়া শিল্পীৰ এটা দলে বৰপেটাৰ তাঁতীকুছি নামৰ ঠাইত বৃন্দাবনী বস্ত্রখন বৈ উলিয়াইছিল৷ মহাৰাজ নৰনাৰায়ণৰ লগত থকা এই বস্ত্রখন পৰৱর্তী সময়ত ভূটান আৰু তিব্বত পাইছিলগৈ৷

১৯০৫ চনত ব্রিটিছে তিব্বতৰ পৰা এই বস্ত্রখন উদ্ধাৰ কৰি মিউজিয়ামত সংৰক্ষণ কৰি ৰাখে৷ বৃন্দাবনী বস্ত্রৰ আন এটা খণ্ড পেৰিছ মিউজিয়ামত, লছ এঞ্জেলছৰ মিউজিয়াম আৰু নিউয়র্ক মিউজিয়ামত সংৰক্ষিত হৈ আছে৷

ডিজিটেল ডেস্ক, ১৮ নৱেম্বৰ