মধ্যবিত্তৰ মজা

প্রধানমন্ত্রীৰ এই ঘোষণাৰ অর্থই হ’ল এইবাৰৰ পূজা দেশবাসীৰ বাবে বেছ উপভোগ্য হ’ব৷ জীৱনদায়িনী ঔষধৰ পৰা স্বাস্থ্য বীমালৈ, গাখীৰ, মাখন, এ চি, টিভি, টেক্সটাইল, জোতা, চাবোন, টুথপেষ্টলৈ বহু সামগ্রীৰে জিএছটি হ্রাস পাব৷ কৃষকক সকাহ দি জৈৱ কীটনাশক, জলসিঞ্চনৰ সঁজুলি, উদ্যান শস্য, ট্রেক্টৰৰ টায়াৰ–যন্ত্রাংশও সুলভ হ’ব৷ দাম কমিব তিনিচকীয়া বাহন আৰু মটৰচাইকেলৰো৷ সাধাৰণ জনগণক বিশেষকৈ ব্যক্তিগত স্বাস্থ্য বীমা আৰু জীৱন বীমাৰ জিএছটি পূর্বৰ ১৮ শতাংশৰ পৰা ০ শতাংশলৈ হ্রাস কৰাৰ সিদ্ধান্তই অভূতপূর্ব সকাহ দিব৷ লক্ষণীয়ভাৱে জিএছটি হ্রাসৰ ঘোষণাৰ পিছতে ভাৰতৰ শ্বেয়াৰ বজাৰত সাময়িকভাৱে হ’লেও এক লক্ষণীয় উত্থান পৰিলক্ষিত হৈছিল৷ এঘণ্টাৰ ভিতৰতে ছেনছেক্স ৭০০ পইণ্টৰ পৰা ৮১ হাজাৰ পইণ্টলৈ বৃদ্ধি হৈছিল৷ সমান্তৰালকৈ ষ্টক এক্সছেঞ্জৰ নিফটিৰ সূচাংকও ১৫৬ পইণ্টৰ পৰা ২৪,৮৭০ পইণ্ট পাইছিলগৈ৷ ট্রাম্পৰ শুল্ক বোমাৰ আঘাতত মাত্র দুটা দিনতেই ১০ লাখ কোটি টকা মূলধন হেৰুওৱা বিনিয়োগকাৰীসকলৰ বাবে এই শ্বেয়াৰ বজাৰৰ উত্থান এক আশাৰ বতৰা আছিল৷ কেন্দ্রীয় চৰকাৰে নতুন জিএছটি ঘোষণা কৰি দেশবাসীক সকাহ দিয়াৰ বিপৰীতে কিন্তু ৪০ শতাংশৰ বিশেষ শ্লেব ঘোষণা কৰাৰ ফলত প্রায় ৪৮ হাজাৰ কোটি টকাৰ ৰাজহ হেৰুওৱাৰ ৰিক্স লৈছে৷ বিলাসী বাহন, বৃহৎ যাতায়াত আৰু সামগ্রী পৰিবাহী বাহন, কোকাকোলা, পেপছি আদি জনপ্রিয় পানীয়, ধঁপাতজাতীয় সামগ্রী, চিগাৰেট, মুখৰোচক পাণমচলা, গুটখা, জর্দা, বিড়ি আদিৰ জিএছটি ৪০ শতাংশ ধার্য কৰাৰ ফলতে কেন্দ্রীয় চৰকাৰে উল্লেখিত এই বিশাল পৰিমাণৰ ৰাজহ হেৰুৱাবলগীয়া হ’ব৷ অৱশ্যেই এই বুজন অংকৰ ৰাজহ হেৰুৱায়ো মোদী চৰকাৰে নতুন জিএছটিৰ পৰিকাঠামো ঘোষণা কৰি সাধাৰণ জনগণক সকাহ দিয়াৰ সাহসিক সিদ্ধান্তই কেৱল দেশবাসীকে উপকৃত কৰাই নহয়, কেন্দ্রীয় চৰকাৰখনৰো ভাবমূর্তি নিশ্চিতভাৱে উজ্জ্বল কৰিব৷