নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

দুর্নীতিত এছিয়াৰ শীর্ষত ভাৰত

নিয়মীয়া বাৰ্তা, ২৭ নৱেম্বৰঃ বিজেপি নেতৃত্বাধীন এনডিএ চৰকাৰে দুর্নীতিক লৈ শূন্য সহনশীলতা গ্রহণ কৰিছে যদিও দেশত দুর্নীতি হ্রাস পোৱা নাই৷ দেশত উৎকোচ অবিহনে কোনো চৰকাৰী কাম যে নহয়, তাৰ প্রমাণ আন্তর্জাতিক দুর্নীতি নিৰীক্ষণ প্রহৰী সংস্থা ট্রেন্সপাৰেঞ্চী ইণ্টাৰনেচনেলৰ প্রতিবেদনত প্রকাশ পাইছে৷

‘গ্ল’বেল কৰাপছন বেৰ’মিটাৰ (জিচিবি) এছিয়া’ শীর্ষক প্রতিবেদনখনত এছিয়াৰ ভিতৰত ৩৯ শতাংশ উৎকোচৰ হাৰেৰে শীর্ষ স্থানত আছে ভাৰত৷ প্রতিবেদনখনত এছিয়াৰ দেশসমূহত ৫০ শতাংশ লোকে যিকোনো কামৰ বাবে উৎকোচ দিবলগীয়া হয় বুলি স্বীকাৰ কৰাৰ বিপৰীতে ৩২ শতাংশ লোকে ব্যক্তিগতভাৱে উৎকোচ দিহে চৰকাৰী কাম–কাজ কৰে বুলি দাবী কৰিছে৷ ভাৰতত এইক্ষেত্রত সর্বাধিক ৩৯ শতাংশ উৎকোচৰ হাৰ চলি আছে৷

প্রতিবেদনত প্রকাশ পোৱা মতে, ৬৩ শতাংশ ভাৰতীয়ই দুর্নীতিৰ বিষয়ত সৰৱ হোৱাৰ পিছত নেতিবাচক ফল পায় বুলি দাবী কৰিছে৷ ভাৰতৰ লগতে মালয়েছিয়া, থাইলেণ্ড, শ্রীলংকা আৰু ইণ্ডোনেছিয়াতো এই হাৰ বেছি৷ ভাৰতত ৮৯ শতাংশ লোকে চৰকাৰী দুর্নীতি বৃহৎ সমস্যা বুলি প্রকাশ কৰিছে৷ গুৰুত্বপূর্ণ যে এছিয়াৰ অর্থনৈতিক শক্তিশালী দেশ জাপানত উৎকোচৰ হাৰ মাত্র ২ শতাংশ৷ তেনেদৰে পর্যটকৰ আকর্ষণীয় মালদ্বীপতো উৎকোচৰ হাৰ ২ শতাংশ৷

আনহাতে, দক্ষিণ কোৰিয়াত ১০ শতাংশ আৰু নেপালত ১২ শতাংশ উৎকোচৰ হাৰ৷ সংস্থাটোৱে ১৭খন দেশৰ ৮৩৬ নিযুত লোকক লৈ এই সমীক্ষা চলাইছিল৷

You might also like