এছিয়াৰ Most wanted ড্রাগছ সৰবৰাহকাৰী ল’পক গ্রেপ্তাৰ
নিয়মীয়া বাৰ্তা, ২৫ জানুৱাৰীঃ ইউৰোপীয় দেশ নেদাৰলেণ্ডৰ আৰক্ষীয়ে বিশ্বৰ বৃহত্তম ড্রাগছ সৰবৰাহকাৰী চক্রৰ কুখ্যাত অপৰাধী ছে চি ল’পক গ্রেপ্তাৰ কৰিছে৷ অষ্ট্রেলিয়াৰ এক পৰোৱানাৰ অধীনত আমষ্টাৰডাম আৰক্ষীয়ে গ্রেপ্তাৰ কৰিছে ল’পক৷
চীনত জন্মগ্রহণ কৰা ল’প হৈছে কানাডাৰ নাগৰিক৷ স্মর্তব্য যে ‘দ্য কোম্পানী’ শীর্ষক কুখ্যাত ড্রাগছ সৰবৰাহকাৰী চক্রটোৰ মুৰব্বী হৈছে ল’প৷ সমগ্র এছিয়াজুৰি ৭ হাজাৰ কোটি ডলাৰ মূল্যৰ অবৈধ ড্রাগছৰ বেহা চলাই আহিছে এই চক্রটোৱে৷
ছে চি ল’পক বিশ্বৰ অন্যতম পলাতক অপৰাধী হিচাপে গণ্য কৰা হৈছিল৷ পৃথিৱীৰ বিভিন্ন দেশৰ আৰক্ষীয়ে বিচাৰি আছিল এই কুখ্যাত অপৰাধীটোক৷ আমষ্টাৰডামৰ স্কিফ’ল বিমানবন্দৰত আৰক্ষীয়ে গ্রেপ্তাৰ কৰিবলৈ সক্ষম হয় ল’পক৷
অষ্ট্রেলিয়া চৰকাৰে এতিয়া ল’পৰ প্রত্যর্পণ দাবী কৰি নেদাৰলেণ্ড প্রশাসনলৈ পত্র লিখাৰ সম্ভাৱনা আছে৷ স্মর্তব্য যে অষ্ট্রেলিয়াতো এক পৃথক নামেৰে এই ড্রাগছ সৰবৰাহকাৰী চক্রটোৱে অবৈধ ব্যৱসায় চলাই আহিছে৷