নিয়মীয়া বাৰ্তা, ২৯ অক্টোবৰঃ প্রশাসনীয় ক্ষেত্রত গাফিলতিৰ বাবেই দিল্লী বিশ্ববিদ্যালয়ৰ উপাচার্য যোগেশ ত্যাগীক কালি নিলম্বন কৰা হৈছে৷ ৰাষ্ট্রপতি ৰামনাথ কোৱিন্দৰ নির্দেশমর্মে উপাচার্যগৰাকীক নিলম্বন কৰা বুলি শিক্ষা মন্ত্রালয়ে এক বিবৃতিত সদৰী কৰিছে৷ ৰাষ্ট্রপতিৰ এই নির্দেশনাত উল্লেখ কৰা হৈছে যে চিকিৎসাজনিত কাৰণত ত্যাগী বিশ্ববিদ্যালয়খনত অনুপস্থিত থকা বিষয়টোক গাফিলতি হিচাপে গণ্য কৰা হ’ব৷
স্মর্তব্য যে ৰাষ্ট্রপতি ৰামনাথ কোৱিন্দ হৈছে দিল্লী বিশ্ববিদ্যালয়ৰ এগৰাকী ভিজিটৰ৷ পৰহিৰ শিক্ষা মন্ত্রালয়ে উপাচার্যগৰাকীৰ বিৰুদ্ধে তদন্ত চলাব লাগে বুলি কৰা আবেদনত অনুমোদন জনোৱাৰ পিছতে উপাচার্য ত্যাগীৰ নিলম্বন নিশ্চিত হৈ পৰে৷ শিক্ষা মন্ত্রালয়ে আজি প্রকাশ কৰা বিবৃতিটোত এই কথাও উল্লেখ কৰিছে যে বিশ্ববিদ্যালয়ৰ প্রশাসনিক নীতি–নির্দেশনা মানি চলা নাছিল ত্যাগীয়ে৷
ইয়াৰ ফলত বিশ্ববিদ্যালয়খনৰ পৰিচালনাত সৃষ্টি হৈছিল বিভিন্ন সমস্যা৷ আনকি বিশ্ববিদ্যালয়খনৰ কাম–কাজতো ব্যাপক অনিয়মৰ সৃষ্টি হৈছিল৷