পঞ্জাবৰ মোহালীৰ ফেজ-৯ৰ ঔদ্যোগিক অঞ্চলত অৱস্থিত এটা অক্সিজেন প্লাণ্ট ত আজি এটা ভয়ংকৰ বিস্ফোৰণ সংঘটিত হয়। এই দুৰ্ঘটনাত দুজন শ্ৰমিক দেৱেন্দ্ৰ আৰু আছিফৰ ঘটনাস্থলীতেই মৃত্যু হয়, আনহাতে তিনিজন আন লোক গুৰুতৰভাৱে আহত হয়, যিসকলক হাস্পতালত ভৰ্তি কৰা হৈছে।
অক্সিজেন প্লাণ্টত হোৱা এই বিস্ফোৰণৰ শব্দ দূৰ-দূৰান্তলৈ শুনা গৈছিল, যাৰ ফলত অঞ্চলটোত আতংকৰ সৃষ্টি হৈছিল। ঘটনাৰ খবৰ পোৱাৰ লগে লগে আৰক্ষী, জিলা প্ৰশাসনৰ দল ঘটনাস্থলীত উপস্থিত হৈ উদ্ধাৰ আৰম্ভ কৰে।
প্ৰকৃততে এই ভয়ংকৰ দুৰ্ঘটনা প্লাণ্টৰ পৰিসৰত অক্সিজেন চিলিণ্ডাৰ ভৰোৱাৰ সময়ত সংঘটিত হৈছিল। প্ৰাপ্ত তথ্য অনুসৰি, অক্সিজেন চিলিণ্ডাৰত অত্যধিক চাপৰ ফলত সেইটো ফাটি যায় আৰু এটা তীব্ৰ বিস্ফোৰণ ঘটে। এই বিস্ফোৰণ কিমান শক্তিশালী আছিল, সেইটো ছবিৰ পৰা অনুমান কৰিব পাৰি, য’ত দেৱালবোৰো ভাঙি যোৱা দেখা গৈছে।
বিস্ফোৰণৰ ফলত ফেক্টৰীত ব্যাপক ক্ষতি হয় আৰু ওচৰৰ ভৱনবোৰৰ কাঁচো ভাঙি যায়। আহতসকলক তৎক্ষণাত নিকটৱৰ্তী হাস্পতালত ভৰ্তি কৰা হয়, য’ত তেওঁলোকৰ চিকিৎসা চলি আছে। এই দুৰ্ঘটনাত প্ৰাণ হেৰুওৱা মৃতকসকলৰ পৰিচয় দেৱেন্দ্ৰ আৰু আছিফ বুলি নিশ্চিত হৈছে।
ঘটনাৰ পিছত ফেক্টৰীৰ বাহিৰত ক্ষুব্ধ জনতাই হৈ চৈ কৰে আৰু আৰক্ষী তথা ফেক্টৰী প্ৰশাসনৰ সৈতে তীব্ৰ তৰ্কত লিপ্ত হয়।
জনতাৰ অভিযোগ যে ফেক্টৰীত সুৰক্ষাৰ মানদণ্ডৰ অৱহেলা কৰা হৈছিল আৰু পূৰ্বেও এনে দুৰ্ঘটনাৰ আশংকা প্ৰকাশ কৰা হৈছিল। আৰক্ষীয়ে জনতাক শান্ত কৰি পৰিস্থিতি নিয়ন্ত্ৰণলৈ আনি গোচৰৰ তদন্ত আৰম্ভ কৰিছে।
Niyomiya Barta Desk, 6 August, 2025