আন্তঃচৰকাৰী কমিটীৰ অধিৱেশনত ঘোষণা, ইউনেস্ক’ৰ সাংস্কৃতিক ঐতিহ্যৰ তালিকাত দীপাৱলী

ইউনেস্ক’ৰ ‘মানৱতাৰ বিমূর্ত সাংস্কৃতিক ঐতিহ্যৰ তালিকা’ত অন্তর্ভুক্ত হৈছে ভাৰতৰ পোহৰৰ উৎসৱ দীপাৱলী৷ যোৱা ৮ ডিচেম্বৰৰ পৰা অনুষ্ঠিত ২০সংখ্যক ইউনেস্ক’ আন্তঃচৰকাৰী কমিটীৰ সত্রত এই ঘোষণা কৰা হয়৷

দিল্লীৰ লালকিল্লাত অহা ১৩ ডিচেম্বৰলৈ চলিবলগীয়া এই সমিতিৰ ফালৰ পৰা ঘোষণা কৰা তালিকাখনত দীপাৱলী হ’ল ১৬সংখ্যক ভাৰতীয় উপাদান৷ ১৯৪খন সদস্য ৰাষ্ট্র, আন্তঃৰাষ্ট্রীয় বিশেষজ্ঞ আৰু ইউনেস্ক’ৰ গোলকীয় নেটৱর্কৰ প্রতিনিধিবর্গৰ পৰা উপস্থিত থকা প্রতিনিধিসকলৰ উপস্থিতিত দীপাৱলীক এই তালিকাখনত অন্তর্ভুক্ত কৰা হয়৷

ভাৰতৰ উপ–ৰাষ্ট্রপতি চি পি ৰাধাকৃষ্ণনে দীপাৱলীক বিমূর্ত সাংস্কৃতিক ঐতিহ্যৰ তালিকাত অন্তর্ভুক্ত কৰাৰ সিদ্ধান্তত সন্তোষ প্রকাশ কৰিছে৷ তেওঁ কয় যে এনে এটি গোলকীয় স্বীকৃতি প্রতিগৰাকী ভাৰতীয়ৰ বাবে এক বিশেষ গৌৰৱৰ মুহূর্ত৷

সামাজিক মাধ্যমত দিয়া এটি পোষ্টত উপ–ৰাষ্ট্রপতিগৰাকী কয় যে দীপাৱলী কেৱল এটা উৎসৱেই নহয়, ই এটা সভ্যতাৰ পৰিঘটনা৷ যিয়ে দেশখনক একত্রিত কৰে আৰু সমগ্র বিশ্বকে উজ্জীৱিত কৰে৷ প্রধানমন্ত্রী নৰেন্দ্র মোদীয়েও ইউনেস্ক’ৰ এই স্বীকৃতিক আদৰণি জনায়৷ এই সন্দর্ভত তেওঁ কয় যে দীপাৱলী ভাৰতৰ সংস্কৃতি আৰু নৈতিকতাৰ সৈতে সম্পর্কিত আৰু আমাৰ সভ্যতাৰ আত্মাক ই প্রতিনিধিত্ব কৰে৷

ডিজিটেল ডেস্ক, ১১ ডিচেম্বৰ