শুৱালকুছিত ড০ শর্মাৰ হৈ প্রচাৰ অতুল বৰা–কেশৱ মহন্তৰ

নিয়মীয়া বাৰ্তা ৩ এপ্ৰিলঃ জালুকবাৰী সমষ্টিৰ মিত্রজোঁটৰ বিজেপি প্রার্থী ড০ হিমন্ত বিশ্ব শর্মাৰ সপক্ষে নির্বাচনী প্রচাৰ চলাবলৈ আজি সন্ধিয়া শুৱালকুছিত উপস্থিত হয় অসম গণ পৰিষদৰ সভাপতি অতুল বৰা আৰু কার্যকৰী সভাপতি কেশৱ মহন্ত৷ পশ্চিম শুৱালকুছি অগপৰ নির্বাচনী কার্যালয়ত অনুষ্ঠিত সভাত ভাষণ দি সভাপতি বৰাই ড০ হিমন্ত বিশ্ব শর্মাক সমষ্টিবাসীক ১০০শতাংশ ভোট প্রদান কৰি অসমৰ ভিতৰত সর্বাধিক ভোটত জয়ী কৰাবলৈ আহ্বান জনায়৷ অগপৰ কর্মীসকলকো এইক্ষেত্রত আগভাগ ল’বলৈ তেওঁ আহ্বান জনায়৷

এইবাৰ অসমত বিজেপি মিত্রদলৰ চৰকাৰ হোৱাটো নিশ্চিত বুলি উল্লেখ কৰি তেওঁ পূর্বতকৈও এইবাৰ মিত্রদলে আসন বেছি পাব বুলি দোহাৰে৷ সভাত কার্যকৰী সভাপতি কেশৱ মহন্তই কয় যে ড০ হিমন্ত বিশ্ব শর্মাই অসমত এখন কংগ্রেছমুক্ত বিজেপি চৰকাৰ গঠন কৰিবলৈ অসমৰ ইমূৰৰ পৰা সিমূৰলৈকে দিনে–নিশাই যি কষ্ট কৰিছে সি নিশ্চয়কৈ আদৰণীয়৷ মিত্রজোঁটৰ প্রার্থীৰ বাবেও তেওঁ সর্বাধিক কষ্ট কৰাটো আমি লক্ষ্য কৰিছেছা৷ তেওঁৰ কষ্ট কোনোপধ্যে অথলে নাযায়৷ দিছপুৰত মিত্রজেজাটৰ চৰকাৰ হোৱাটো নিশ্চিত৷

মন্ত্রী কেশৱ মহন্তই কয় ড০ হিমন্ত বিশ্ব শর্মাৰ নির্বাচনী প্রচাৰক লৈ সমষ্টিবাসীৰ যি পাৰভঙা উছাহ তাক লৈ আমি আচৰিত হৈ পৰিছেছা৷ তেওঁৰ বিজয় নিশ্চিত৷ মাত্র সকলো লোকে যিকোনো অসুবিধা দূৰ কৰি ৬ এপ্রিলত ভোটদান কৰি ড০ শর্মাক অভিলেখসংখ্যক ভোটত বিজয়ী কৰিবলৈ ভোটাৰ ৰাইজক অনুৰোধ জনায়৷ সভাত অগপৰ মনোজ শইকীয়া, ৰজনী দাস, গোবিন্দ দাস, বিজেপি দলৰ কুমদ বৈশ্য, জিলা পৰিষদৰ সদস্যা নন্দিতা কলিতা, ৰমেন কলিতা প্রমুখ্যে কেইবাজনো নেতা–কর্মী উপস্থিত থাকে৷