প্ৰথমটো বিশ্বকাপ জয়ৰ পৰা দুখোজ দূৰৈত ভাৰতীয় মহিলা দল

আইচিচি মহিলা বিশ্বকাপ ২০২৫ত ভাৰতে সুন্দৰ প্ৰদৰ্শন কৰি ছেমিফাইনেলত নিজৰ স্থান সুনিশ্চিত কৰিছে। হৰমনপ্ৰীত কৌৰৰ নেতৃত্বত ভাৰতীয় দলে নিউজিলেণ্ডক ডাকৱৰ্থ-লুইছ পদ্ধতি (DLS) অনুসৰি ৫৩ ৰানত পৰাস্ত কৰি শেষৰ দল হিচাপে ছেমিত প্ৰৱেশ কৰিছে। এই জয়ৰ সৈতে ভাৰত ছেমিফাইনেলত প্ৰৱেশ কৰা চতুৰ্থ দল হিচাপে চিহ্নিত হল।

ছেমিফাইনেলৰ চাৰিটা দল হল— অষ্ট্ৰেলিয়া, ইংলেণ্ড, দক্ষিণ আফ্ৰিকা আৰু ভাৰত। প্ৰথম ছেমিফাইনেল ২৯ অক্টোবৰত গুৱাহাটীত অনুষ্ঠিত হ’ব আৰু দ্বিতীয় ছেমিফাইনেল তথা ফাইনেলখন নবী মুম্বাইৰ ডি’ৱাই পাটিল ষ্টেডিয়ামত হ’ব। ট্রফীৰ চূড়ান্ত সংগ্ৰাম ২ নবেম্বৰত অনুষ্ঠিত হ’ব।

মান্ধানা-প্ৰতিকাৰ শতকেৰে ভাৰতৰ কামবেক

তিনি খেলত পৰাজয়ৰ পাছত নিউজিলেণ্ডৰ বিৰুদ্ধে মেচখন ভাৰতৰ বাবে ‘ডু অৰ ডাই’ পৰিস্থিতিৰ দৰে আছিল। দলটোৱে সুন্দৰ কামব্যাক কৰি উৎকৃষ্ট জয় অর্জন কৰে। ভাৰতীয় অপেনাৰ স্মৃতি মান্ধানা (১০৯ ৰান) আৰু প্ৰতিকা ৰাৱাল (১২২ ৰান)-এ প্ৰথম উইকেটৰ বাবে ২১২ ৰানৰ ৰেকৰ্ডসংখ্যক পাৰ্টনাৰশ্বিপ কৰি দলক মজবুত আৰম্ভণি দিয়ে। তাৰ পিছত জেমিমা ৰড্ৰিগছে অপৰাজিত ৭৬ ৰান যোগ কৰি ভাৰতৰ স্ক’ৰ ৪৯ অভাৰত ৩৪০/৩লৈ লৈ যায়।

বৰষুণৰ বাবে মেচখনক ৪৯-৪৯ অভাৰত সীমিত কৰা হয়, কিন্তু নিউজিলেণ্ডৰ ইনিংছ আৰম্ভ হোৱাৰ লগে লগে আকৌ বৰষুণ নামি আহে আৰু অভাৰ কমাই ৪৪ কৰা হয়।

বৰষুণে আনিলে ৰোমাঞ্চ

বৰষুণে প্ৰভাৱিত এই খেলত নিউজিলেণ্ডক ৪৪ অভাৰত ৩২৫ ৰানৰ লক্ষ্য দিয়া হয়। যদিও ব্ৰুক হেলিডে (৮১) আৰু ইজাবেল গেজে (অপৰাজিত ৬৫) সুন্দৰ খেল প্ৰদৰ্শন কৰে, দলটো মাত্ৰ ২৭১ ৰানত অল-আউট হয়। ভাৰতৰ হৈ ৰেণুকা সিং আৰু ক্ৰান্তি গৌড়ে দুটাকৈ উইকেট লয়, আৰু দীপ্তি শৰ্মা, স্নেহ ৰাণা, প্ৰতিকা ৰাৱাল আৰু শ্ৰী চৰণীয়ে এটাকৈ উইকেট দখল কৰে।

ইতিহাসৰ পৰা দুটা জয় দূৰত ভাৰতীয় দল

এই জয়ৰ সৈতে ভাৰত ছেমিফাইনেলত স্থান দখল কৰা শেষ দল হৈ পৰিছে। এতিয়া টীম ইণ্ডিয়া কেৱল দুটা জয় দূৰত ইতিহাস ৰচাৰ পৰা। যদি ভাৰতীয় দলে ফাইনেলত জয় লাভ কৰে, তেন্তে ই হ’ব ভাৰতীয় মহিলা দলৰ প্ৰথম বিশ্বকাপ।

২৬ অক্টোবৰত ভাৰতে নিজৰ অন্তিম লীগ মেচখন বাংলাদেশৰ বিৰুদ্ধে খেলিব— এইখন ছেমিফাইনেলৰ পূৰ্বে দলৰ আত্মবিশ্বাস বঢ়াবলৈ এটা সোণালী সুযোগ হ’ব।

নিয়মীয়া বাৰ্তা ডেস্ক, ২৪ অক্টোবৰ