লোভনীয় ৩০০ কোটিৰ অফাৰ নাকচ কিং কোহলিৰ!

সম্প্রতি এদিনীয়া ক্রিকেটত দুর্দান্ত ফর্মত থকা টীম ইণ্ডিয়াৰ তাৰকা বেটাৰ বিৰাট কোহলিয়ে এইবাৰ খেলপথাৰৰ বাহিৰত নতুন ইনিংছ আৰম্ভ কৰিছে৷ তেওঁ স্প’ৰ্টছৱেৰ ষ্টার্টআপ এজিলিটাছ স্প’ৰ্টছৰ সৈতে চুক্তিবদ্ধ হৈছে৷

এজিলিটাছ স্প’ৰ্টছৰ সৈতে চুক্তিবদ্ধ হোৱাৰ বাবে কোহলিয়ে বিশ্ববিখ্যাত কোম্পানী পুমাই দিয়া ৩০০ কোটি টকাৰ প্রস্তাৱকো নাকচ কৰিছে৷ দক্ষিণ আফ্রিকাৰ বিৰুদ্ধে সদ্যসমাপ্ত তিনিখনীয়া এদিনীয়া মেচৰ শৃংখলাটোত দুটা শতক আৰু এটা অর্ধশতক অর্জন কৰি মেন অৱ দ্য ছিৰিজৰ বঁটা লাভ কৰা কোহলিয়ে দেওবাৰে লণ্ডনলৈ ৰাওনা হয়৷

লণ্ডনত উপস্থিত হোৱাৰ পিছতে ছ’চিয়েল মিডিয়াত ঘোষণা কৰিলে স্প’ৰ্টছৱেৰ ষ্টার্টআপ এজিলিটাছ স্প’ৰ্টছৰ সৈতে চুক্তিবদ্ধ হোৱাৰ কথা৷ কিং কোহলি কোম্পানীটোৰ ব্রেণ্ড এম্বেছাদৰেই নহয়, এই নতুন ষ্টার্টআপত বিনিয়োগকাৰীও হ’ব৷ লগতে তেওঁৰ ১.৯৪ শতাংশ অংশীদাৰিত্ব থাকিব৷
কেৱল সেয়াই নহয়, এজিলিটাছ স্প’ৰ্টছৰ বাণিজ্যিক কৌশলৰ জৰিয়তে বিৰাটৰ নিজা কাপোৰৰ ব্রেণ্ড ৱান ৮ৰ সামগ্রীও বিক্রী কৰা হ’ব৷ মন কৰিবলগীয়া যে কোহলিয়ে চলিত বর্ষৰ আৰম্ভণিতে পুমাৰ সৈতে থকা ৮ বছৰীয়া চুক্তি ভংগ কৰিছিল৷

এই চুক্তি ২০১৭ চনত ১১০ কোটি টকাত স্বাক্ষৰিত হৈছিল৷ জানিব পৰা মতে পুমাই বিৰাট কোহলিক নৱীকৰণৰ বাবে ৩০০ কোটি টকা আগবঢ়াইছিল৷ কিন্তু সেই প্রস্তাৱ নাকচ কৰিলে কোহলিয়ে৷

মন কৰিবলগীয়া যে ভাৰত আৰু দক্ষিণ পূব এছিয়াৰ পুমাৰ প্রাক্তন পৰিচালন সঞ্চালক অভিষেক গাংগুলীয়ে আৰম্ভ কৰিছে এজিলিটাছ স্প’ৰ্টছ ষ্টার্টআপ৷ কোহলিয়ে এজিলিটাছ স্প’ৰ্টছত প্রায় ৪০ কোটি টকা বিনিয়োগ কৰিছে৷

ডিজিটেল ডেস্ক, ৯ ডিচেম্বৰ

লগতে এইটোও পঢ়ক —– খানাপাৰাত মেলন উন্মাদনা, জুবিন গার্গক কিংবদন্তি আখ্যা মেলনৰ