নিয়মীয়া বাৰ্তা, ৬ ফেব্রুৱাৰী : দেশৰ জনপ্রিয় মুখ্যমন্ত্রীৰ শীর্ষত অসমৰ মুখ্যমন্ত্রী ড০ হিমন্ত বিশ্ব শর্মা৷ অৰমেক্স মিডিয়াই দেশৰ ২২খন ৰাজ্যত চলোৱা সমীক্ষাত অসমৰ মুখ্যমন্ত্রী ড০ হিমন্ত বিশ্ব শর্মাই ৰেটিঙত ৭০ শতাংশৰে শীর্ষস্থান লাভ কৰিছে৷ উল্লেখ্য যে কিছুদিন পূর্বে ইণ্ডিয়া টুডে’ৰ সমীক্ষাত অসমৰ মুখ্যমন্ত্রী ড০ শর্মাই দেশৰ বিজেপিশাসিত ৰাজ্যৰ ভিতৰত সবাতোকৈ জনপ্রিয় মুখ্যমন্ত্রী হিচাপে স্থান লাভ কৰিছিল৷ ইয়াৰ পাছতেই অৰমেক্স মিডিয়াই চলোৱা সমীক্ষাত জানুৱাৰী, ২০২২ত মুখ্যমন্ত্রীৰ ৰেটিঙত ৭০ শতাংশৰে অসমৰ মুখ্যমন্ত্রীগৰাকীয়ে শীর্ষস্থান লাভ কৰাৰ বিপৰীতে ৬৪ শতাংশৰে দ্বিতীয় স্থানত উত্তৰ প্রদেশৰ মুখ্যমন্ত্রী যোগী আদিত্যনাথ৷
অৰমেক্স মিডিয়াই টুইটযোগে কালি ঘোষণা কৰা তালিকাখনত ৬৩ৰে তৃতীয় স্থানত পশ্চিমবংগৰ মুখ্যমন্ত্রী মমতা বেনার্জী৷ তালিকাত স্থান লাভ কৰা মুখ্যমন্ত্রীকেইগৰাকী ক্রমে তামিলনাডুৰ এম কে ষ্টেলীন, দিল্লীৰ অৰবিন্দ কেজৰিৱাল, ওড়িশাৰ নবীন পাটনায়ক, মধ্যপ্রদেশৰ শিৱৰাজ চৌহান, গুজৰাটৰ ভূপেন্দ্র পেটেল, মহাৰাষ্ট্রৰ উদ্ধৱ থাকৰে, কেৰালাৰ পিনাৰাই বিজয়ন, কর্ণাটকৰ বাসৱৰাজ বোম্মাই, ছত্তিশগড়ৰ ভূপেশ বাঘেল, হিমাচল প্রদেশৰ জয়ৰাম ঠাকুৰ, গোৱাৰ প্রমোদ সাৱন্ত, অন্ধ্রপ্রদেশৰ জগমোহন ৰেড্ডী, তেলেংগানাৰ কে চন্দ্রশেখৰ ৰাও, ৰাজস্থানৰ অশোক গেহলট, উত্তৰাখণ্ডৰ পুস্কৰ সিং ধামী, বিহাৰৰ নীতিশ কুমাৰ, হাৰিয়ানাৰ এম এল খট্টৰ, পঞ্জাবৰ চৰণজিৎ সিং ছান্নি আৰু ঝাৰখণ্ডৰ হেমন্ত চ’ৰেণ৷
উল্লেখ্য যে অৰুণাচল প্রদেশ, মণিপুৰ, মেঘালয়, মিজোৰাম, নাগালেণ্ড, ছিকিম আৰু ত্রিপুৰাৰ মুখ্যমন্ত্রী সমীক্ষাত নাছিল৷