নিয়মীয়া বাৰ্তা, ২২ জানুৱাৰীঃ বিমুদ্ৰাকৰণৰ পাচত দেশত প্ৰচলিত জালনোট বন্ধ হ’ব বুলি আশা প্ৰকাশ কৰা হৈছিল যদিও হিতে বিপৰীত হোৱা দেখা গ’ল নতুন দুই হাজাৰ টকীয়া নোটৰ ক্ষেত্ৰত । ২০১৬ চনৰ ৮ নৱেম্বৰ তাৰিখে মোডী চৰকাৰে বিমুদ্ৰাকৰণৰ জৰিয়তে ১০০০ টকীয়া নোটৰ প্ৰচলন বন্ধ কৰি ২০০০ টকীয়া নোট ছপা কৰি বজাৰত মুকলি কৰিছিল । দেশত প্ৰচলিত ক’লা টকা ৰোধৰ বাবে গ্ৰহণ কৰা এই ব্যৱস্থাৰ পাচত কিন্তু এতিয়া পোহৰলৈ আহিছে এক ভয়ংকৰ তথ্য ।
নেশ্বনেল ক্ৰাইম ৰেকৰ্ডছ ব্যুৰ’ৰ (NCRB) তথ্য অনুসৰি দেশত উদ্ধাৰ হোৱা ৫৬ শতাংশ জালনোটেই হৈছে ২০০০ টকাৰ নোট । এই তথ্য অনুসৰি ২০১৮ চনত সমগ্ৰ দেশত ১৭.৯৬ কোটি টকা মূল্যৰ ২,৫৭,২৪৩ খন জালনোট জব্দ কৰা হৈছে । ইয়াৰে ৫৬ শতাংশ অৰ্থাৎ ৫৪,৭৭৬ খনেই হৈছে ২,০০০ টকীয়া নোট আৰু ইয়াৰ মূল্য ১০.৯৬ কোটি টকা । ২০১৭ চনত মুঠ জালনোটৰ ৫৩ শতাংশ আছিল ২০০০ টকীয়া নোট ।
উল্লেখ্য যে, ২০১৮ বৰ্ষত উদ্ধাৰ হোৱা ২,০০০ টকীয়া জালনোটৰ ২৬.২৮ শতাংশ জব্দ কৰা হৈছে গুজৰাটত । মুঠ ৬.৯৩ কোটি টকাৰ দুহাজাৰ টকীয়া নকল নোট জব্দ কৰা হৈছে গুজৰাটত । এই তথ্য অনুসৰি উত্তৰ-পূৰ্বাঞ্চলৰ ভিতৰত অসমত ২০০০ টকীয়া জালনোট জব্দ কৰা হৈছে ৯৪ লাখ টকা । মিজোৰামত ২০০০ টকীয়া জালনোট জব্দ কৰা হৈছে ১.৩৩ কোটি টকা ।
২০০০ টকীয়া জালনোটে দেশৰ অৰ্থনীতিলৈ ভাবুকি কঢ়িয়াই অনাৰ সময়তে ২০১৯ বৰ্ষত ৰিভাৰ্জ বেংকে এখনো ২০০০ টকীয়া নোট ছপা কৰা নাই বুলি উল্লেখ কৰে ।