নিয়মীয়া বাৰ্তা, ২৫ জানুৱাৰীঃ বিগত দুটা দশকৰ পাছত প্রথমবাৰৰ বাবে দেশৰ কর্প’ৰেট আৰু আয়কৰ সংগ্রহ নিম্নগামী হৈছে ৷ চলিত বর্ষৰ জানুৱাৰী মাহত বিগত বর্ষৰ তুলনাত ৫.৫ শতাংশ এই কৰ সংগ্রহ হ্রাস পাইছে ৷ কৰ বিভাগৰ শীর্ষ সূত্রই প্রকাশ কৰা মতে, ২৩ জানুৱাৰীলৈকে দেশত সংগৃহীত কর্প’ৰেট আৰু কৰৰ পৰিমাণ হৈছে ৭.৩ লাখ কোটি টকা৷ চলিত বিত্তীয় বর্ষৰ সামৰণি ৩১ মার্চলৈকে নৰেন্দ্র মোদী নেতৃত্বাধীন এন ডি এ চৰকাৰে কৰ সংগ্রহ ১৩.৫ লাখ কোটি টকাৰ লক্ষ্য লৈছিল যদিও কার্যতঃ ই সক্ষম নহ’ল ৷
চৰকাৰে বিত্তীয় বর্ষটোৰ ১৭ শতাংশ কৰ সংগ্রহ বৃদ্ধিৰ লক্ষ্য লৈছিল যদিও তথ্য মতে পূর্বৰ বর্ষতকৈ অর্থাৎ বিগত দুটা দশকৰ ভিতৰত চলিত বিত্তীয় বর্ষত কৰ সংগ্রহ হ্রাস পাইছে ৷ কৰ বিভাগৰ শীর্ষ বিষয়াই প্রকাশ কৰা মতে আর্থিক বিকাশৰ হাৰ নিম্নগামী হোৱাৰ লগতে কর্প’ৰেট কৰ হাৰ কর্তন কৰাৰ বাবেই দেশৰ কর্প’ৰেট আৰু কৰ সংগ্রহ হ্রাস পাইছে ৷ বিত্তীয় বর্ষ ২০১৮–১৯ত কৰ বিভাগে কৰ সংগ্রহৰ বাবে বিভিন্ন পদক্ষেপ গ্রহণ কৰাৰ পাছতো কোনো কাৰণতে ১১.৫ লাখ কোটি টকাৰ সীমা স্পর্শ কৰিব নোৱাৰে বুলি কয় শীর্ষ বিষয়াই ৷ জ্যেষ্ঠ শীর্ষ বিষয়াই প্রকাশ কৰা মতে ২০১৯ বিত্তীয় বর্ষত প্রত্যক্ষ কৰ সংগ্রহ ১০ শতাংশ নিম্নগামী হোৱাৰ সম্পূর্ণ সম্ভাৱনা আছে ৷ মন কৰিবলগীয়া যে চৰকাৰৰ ৰাজহৰ ৮০ শতাংশই কৰৰ পৰা সংগ্রহ হয় ৷ কৰ সংগ্রহ হ্রাস পোৱাৰ বাবে চৰকাৰে ব্যয় হ্রাস কৰাৰ পৰিকল্পনা কৰিব লাগিব ৷