নিয়মীয়া বাৰ্তা, ২৫ জুনঃ আসন্ন ১৭ বছৰ অনূর্ধ্ব মহিলা বিশ্বকাপ ফুটবলৰ কঠিন গ্রুপত স্থান লাভ কৰিছে আয়োজক ভাৰতে৷ আজি ফিফাৰ মুখ্য কার্যালয় জুৰিখত প্রকাশ কৰা প্রতিযোগিতাখনৰ সূচী অনুসৰি, ভাৰতে গ্রুপ ‘এ’ত স্থান লাভ কৰিছে৷ ভাৰতৰ সৈতে এই গ্রুপত আছে ফুটবলৰ পাৱাৰ হাউছ ব্রাজিল, মৰক্কো আৰু আমেৰিকা৷ প্রতিযোগিতাখনত মুঠ ১৬টা দলে অংশগ্রহণ কৰিব৷ এই দলসমূহক চাৰিটা গ্রুপত ভাগ কৰা হৈছে৷ ভাৰতে গ্রুপ ‘এ’ৰ প্রথমখন মেচত আমেৰিকা যুক্তৰাষ্ট্রৰ বিৰুদ্ধে অৱতীর্ণ হ’ব ১১ অক্টোবৰত৷
উল্লেখ্য যে আয়োজক দেশ হিচাপে ভাৰতে প্রতিযোগিতাখনলৈ যোগ্যতা অর্জন কৰিছে আৰু ২০০৮ চনৰ পৰা আৰম্ভ হোৱা ১৬ বছৰ অনূর্ধ্ব মহিলা বিশ্বকাপত দেশখনে প্রথমবাৰৰ বাবে খেলাৰ সুযোগ লাভ কৰিছে৷ প্রতিটো গ্রুপৰ শীর্ষ দুটাকৈ দলে কোৱার্টাৰ ফাইনেললৈ উন্নীত হ’ব৷ ভাৰতে এই লক্ষ্যৰেই অৱতীর্ণ হ’ব যদিও তেওঁলোকৰ পথ অতিশয় কঠিন হ’ব৷ কিয়নো কোনো আয়োজক দেশে এইপর্যন্ত অনুষ্ঠিত ৬খন বিশ্বকাপৰ এখনতো ছেমিফাইনেল খেলিবলৈ সক্ষম হোৱা নাই৷ প্রতিখন প্রতিযোগিতাত আয়োজক দেশে গ্রুপ পর্যায়ৰ পৰাই বিদায় ল’বলগীয়া হৈছে৷ ইউৰোপীয়ান দেশ জার্মানীয়ে বিগত ছয়খন বিশ্বকাপত খেলাৰ সুযোগ লাভ কৰা একমাত্র ইউৰোপীয়ান দেশ৷ গ্রুপ ‘বি’ত জার্মানীয়ে নাইজেৰিয়া, চিলি আৰু নিউজিলেণ্ডৰ বিপক্ষে খেলিব৷
আনহাতে, গ্রুপ ‘চি’ত স্থান লাভ কৰিছে স্পেইন, কলম্বিয়া, মেক্সিকো আৰু চীনে৷ সেইদৰে, গ্রুপ ‘ডি’ত প্রতিদ্বন্দ্বিতা আগবঢ়াব জাপান, তানজানিয়া, কানাডা আৰু ফ্রান্সে৷ প্রতিযোগিতাখন ২০২০ চনত ভাৰতত অনুষ্ঠিত হোৱাৰ কথা আছিল যদিও ক’ভিডৰ বাবে এই বছৰলৈ পিছুৱাই দিয়া হয়৷ অহা ১১–৩০ অক্টোবৰলৈ ভাৰতৰ তিনিখন ষ্টেডিয়াম ক্রমে ভুবনেশ্বৰৰ কলিংগ, মাৰগাঁৱৰ পণ্ডিত জৱাহৰলাল নেহৰু আৰু নৱী মুম্বাইৰ ডি ৱাই পাটিল ষ্টেডিয়ামত অনুষ্ঠিত হ’ব৷