নিয়মীয়া বাৰ্তা, ২ ছেপ্টেম্বৰঃ নগাঁও নুৰুল আমিন ষ্টেডিয়াম প্ৰেক্ষাগৃহত কালি এক সম্বৰ্ধনা অনুষ্ঠান অনুষ্ঠিত হয়৷ গোলাঘাটত সদ্য সমাপ্ত সদৌ অসম টেবুল টেনিচ প্ৰতিযোগিতাত ১৯ অনুৰ্ধ শাখাত অংশগ্ৰহণ কৰি আদিত্য আৰিয়ানে চেম্পিয়ন খিতাপ আঁজুৰি আনিবলৈ সক্ষম হৈছে৷ সেয়ে আৰিয়ানৰ উজ্জ্বল ভৱিষ্যতৰ লগতে খেলুৱৈসকলক উৎসাহ দিয়াৰ উদ্দেশ্যে এই সম্বৰ্ধনা অনুষ্ঠানৰ আয়োজন কৰা হয়৷ সম্বৰ্ধনা অনুষ্ঠানটোত উপস্থিত থাকে প্ৰাক্তন কেন্দ্ৰীয় মন্ত্ৰী ৰাজেন গোহাই, আৰিয়ানৰ প্ৰশিক্ষক মানস প্ৰতীম দাস, বিশিষ্ট ক্ৰীড়া সাংবাদিক বিপুল বৰ্মনকে প্ৰমুখ্যে কৰি বহুকেইগৰাকী বিশিষ্ট ব্যক্তি আৰু একাংশ ন-পুৰণি খেলুৱৈ৷ খেলুৱৈসকলে আৰিয়ানৰ এই সম্বৰ্ধনা অনুষ্ঠানত অংশ গ্ৰহণ কৰি বিশেষভাৱে উৎফুল্লিত হোৱা পৰিলক্ষিত হয়৷
প্ৰেৰক কনক হাজৰিকা