নিয়মীয়া বাৰ্তা ডিজিটেল, ১৩ জুনঃ পুনৰ বিদেশৰ মাটিত খালিস্তানীৰ তাণ্ডৱ আমেৰিকা, কানাডাৰ পিছত এইবাৰ ইটালীত মহাত্মা গান্ধীৰ প্রতিমূর্তি ভাঙিলে খালিস্তানী সমর্থকে৷ প্রধানমন্ত্রী নৰেন্দ্র মোদীৰ ইটালী ভ্রমণৰ সময়ত মহাত্মাৰ এই প্রতিমূর্তিটো উদ্বোধন কৰাৰ কথা আছিল৷ তাৰ পূর্বেই খালিস্তানী সমর্থকে প্রতিমূর্তিটো ভাঙি পেলায়৷ এই ঘটনাত ক্ষুব্ধ হৈছে ভাৰত চৰকাৰ৷ ইটালী চৰকাৰৰ ওচৰত এই ঘটনাত জড়িত অভিযুক্তৰ বিৰুদ্ধে কঠোৰ পদক্ষেপ গ্রহণ কৰাৰো দাবী জনাইছে ভাৰতে৷ দেশৰ প্রধানমন্ত্রী হিচাপে একেৰাহে তৃতীয়বাৰ শপত লৈছে নৰেন্দ্র মোদীয়ে৷ শপত গ্রহণৰ পিছতেই ইটালী ভ্রমণসূচী লৈ আজি দিল্লীৰ পৰা উৰা মাৰিব মোদীয়ে৷ ইটালীত আগন্তুক ১৩ৰ পৰা ১৫ জুনলৈ জি–৭ গোষ্ঠীৰ সন্মিলন অনুষ্ঠিত হ’ব৷ বিশ্বৰ মহাপৰাক্রমী তথা অর্থনৈতিকভাৱে সমৃদ্ধিশালী দেশসমূহৰ জোঁট জি–৭ৰ সন্মিলনত অংশগ্রহণ কৰাৰ বাবে মোদীক ইটালীলৈ আমন্ত্রণ জনাইছে দেশখনৰ প্রধানমন্ত্রী জর্জিয়া মেল’নিয়ে৷ আজি ইটালী অভিমুখে মোদীয়ে যাত্রা কৰাৰ পূর্বে গান্ধীৰ মূর্তি ভাঙি খালিস্তানীয়ে ভাৰতলৈ যি বার্তা দিছে তাক লৈ ক্ষুব্ধ নতুন দিল্লী প্রশাসন৷ ইতিমধ্যে এই ঘটনাৰ ছবি পোহৰলৈ আহিছে৷ লক্ষণীয়ভাৱে মূর্তিটো ভঙাৰ উপৰি ইয়াৰ বেদীত লিখি দিয়া হৈছে বিভিন্ন খালিস্তানী শ্ল’গান৷