নিয়মীয়া বাৰ্তা ডিজিটেল, ৩১ জানুৱাৰীঃ ৰাজকোটত ব্যর্থ হোৱাৰ পিছত এইবাৰ পুনেত টি–২০ শৃংখলা দখলৰ লক্ষ্য লৈছে ঘৰুৱা দল টীম ইণ্ডিয়াই৷ ইংলেণ্ডৰ বিপক্ষে খেলি থকা পাঁচখনীয়া টি–২০ মেচৰ শৃংখলাটোৰ চতুর্থখন মেচ আজি পুনেৰ মহাৰাষ্ট্র ক্রিকেট এছ’চিয়েচন ষ্টেডিয়ামত অনুষ্ঠিত হ’ব৷ এই মেচখন দুয়োটা দলৰ বাবে গুৰুত্বপূর্ণ হিচাপে বিবেচিত হৈছে৷ মেচখনত বিজয় সাব্যস্ত কৰিলে টীম ইণ্ডিয়াই শৃংখলা দখল কৰাটো নিশ্চিত হ’ব৷ বিপৰীতে ইংলেণ্ডে জয়লাভ কৰিলে শৃংখলাটো ২–২ত সমতা স্থাপন হ’ব৷ উল্লেখ্য যে ৰাজকোটত হৈ যোৱা তৃতীয়খন টি–২০ত ইংৰাজ বাহিনীয়ে ২৬ ৰানত জয়লাভ কৰি শৃংখলাটোত প্রত্যাৱর্তন কৰে৷ পুনেৰ উইকেট স্পিন সহায়ক হোৱাৰ লগতে টার্ন আৰু বাউন্সো হ’ব৷ বিশেষকৈ মেচৰ মাজভাগত স্পিনাৰক অধিক সহায় কৰিব৷ কাইলৈৰ মেচখনৰ পূর্বে বেটিং ব্যর্থতাই চিন্তাত ৰাখিছে ঘৰুৱা দল টীম ইণ্ডিয়াক৷ ৰাজকোটত হৈ যোৱা মেচখনত দলটোৰ আগশাৰীৰ বেটাৰ সম্পূর্ণৰূপে ব্যর্থ হৈছিল৷ হার্দিক পাণ্ডিয়াৰ বাহিৰে কোনো এজন বেটাৰে ক্রিজত অধিক সময় তিষ্ঠিব নোৱাৰিলে৷ বিশেষকৈ অধিনায়ক সূর্যকুমাৰ যাদৱৰ দুর্বল বেটিঙে দলটোক অধিক চিন্তাত ৰাখিছে৷ বিগত তিনিখন মেচত অধিনায়কগৰাকীয়ে সম্পূর্ণৰূপে ব্যর্থ হৈছে৷ অৱশ্যে আজিৰ এই গুৰুত্বপূর্ণ মেচখনত অধিনায়ক সূর্যকুমাৰ যাদৱে নিজৰ ছন্দ ওভতাই পাব বুলি আত্মবিশ্বাসী৷ অপেনাৰ যুটিয়ে দলক সুন্দৰ আৰম্ভণি দিব পাৰিব বুলি আশা ব্যক্ত কৰি অধিনায়ক সূর্যকুমাৰে কয় যে বিগত মেচখনত আমি আমাৰ সামর্থ্য অনুসৰি খেলাত সম্পূর্ণৰূপে ব্যর্থ হৈছোঁ৷ অপেনাৰ যুটিয়ে আক্রমণাত্মক আৰম্ভণি কৰাত ব্যর্থ হৈছিল আৰু পৰৱর্তী বেটাৰকেইজনে নিজৰ ছন্দ অনুসাৰে খেলিব পৰা নাছিল৷ আশা কৰিছোঁ– আজিৰ মেচখনত সতীর্থসকলে আশানুৰূপ প্রদর্শন দাঙি ধৰি শৃংখলা দখলত গুৰুত্বপূর্ণ ভূমিকা পালন কৰিব৷ ইফালে ইংলেণ্ডৰ লক্ষ্য হ’ল শৃংখলাটোত সমতা স্থাপন কৰা৷ ইংৰাজ বাহিনীয়ে পুনেতো জয়ৰ ধাৰা অব্যাহত ৰখাৰ লক্ষ্য লৈছে বুলি দলটোৰ অধিনায়ক জ’ছ বাটলাৰে ব্যক্ত কৰে৷
খেলৰ সময়ঃ নিশা ৭ বজা৷