হৰমুজ প্রণালী বন্ধ হ’লেও অন্য পথেৰে ভাৰতলৈ আহিব ইন্ধন

নিউজ ডেস্ক, ২৪ জুনঃ ইৰানে হৰমুজ প্রণালী বন্ধ কৰি দিলে ভাৰতৰ ওপৰত প্রভাৱ পৰাৰ সম্ভাৱনাক লৈ চর্চা আৰম্ভ হৈছে৷ ইৰান আৰু ইজৰাইলৰ মাজত চলা যুদ্ধৰ পৰিপ্রেক্ষিতত খাৰুৱা তেলৰ দাম বৃদ্ধি পালেও ভাৰতত এতিয়াও তেলৰ নাম বৃদ্ধি পোৱা নাই৷

দামবৃদ্ধি হ’লেও ভাৰতৰ বাবে উদ্বিগ্ণতাৰ কাৰণ নাই বুলি স্পষ্ট কৰি দিছে কেন্দ্রীয় পেট্র’লিয়াম মন্ত্রী হৰদ্বীপ সিং পুৰীয়ে৷ হৰমুজ প্রণালী বন্ধ হওক কিম্বা আন কিবা ব্যাঘাতেই জন্মক, ইয়াৰ সৈতে মোকাবিলা কৰিবলৈ ভাৰত ভাল স্থিতিত আছে বুলি কয় কেন্দ্রীয় পেট্র’লিয়াম মন্ত্রী পুৰীয়ে৷

মন্ত্রীগৰাকীয়ে কয় যে এতিয়া হৰমুজ প্রণালীৰে ভাৰতলৈ বৃহৎ পৰিমাণৰ তেল আমদানি নহয়৷ আমাৰ তেল মার্কেটিং কোম্পানীসমূহে কেইবাটাও সপ্তাহজুৰি বিভিন্ন পথেৰে তেল আমদানি কৰি আহিছে৷ এনে পৰিপ্রেক্ষিতত দেশত তেলৰ নাটনি হোৱাৰ সম্ভাৱনা নাই৷

অৱশ্যে দীর্ঘদিন ধৰি হৰমুজ প্রণালী বন্ধ হৈ থাকিলে দেশতো তেলৰ দাম বৃদ্ধি হোৱাটো নুই কৰিব নোৱাৰি৷ স্মর্তব্য যে বিশ্বৰ তথা এছিয়াৰ আন দেশসমূহৰ দৰে ভাৰতলৈও হৰমুজ প্রণালীৰে তেলকে ধৰি বিভিন্ন সামগ্রী আমদানি কৰা হয়৷ ৮৫ শতাংশ আমদানিকৃত তেলৰ ওপৰত নির্ভৰশীল ভাৰতে হৰমুজ প্রণালীৰ লগতে আন বিকল্প পথেৰেও বিগত বছৰবোৰত আমদানি কৰি আহিছে৷

সম্প্রতি হৰমুজ প্রণালীৰে ভাৰতে ৪০ শতাংশ তেল আমদানি কৰে৷ অর্থাৎ প্রতিদিনে ২ নিযুত বেৰেল খাৰুৱা তেল আমদানি কৰে ভাৰতে৷ বাকী ৪৫ শতাংশ বিভিন্ন পথেৰে ভাৰতলৈ আহে৷ এই তথ্যৰ আধাৰত জুকিয়াই চালে হৰমুজ প্রণালী বন্ধ হ’লে ভাৰতৰ ওপৰত অতি সহজতে প্রভাৱ পৰাৰ সম্ভাৱনা কম৷ ইৰাক, ছৌদি আৰব, ইউএই আৰু কুৱেইটৰ পৰা ভাৰতে হৰমুজ প্রণালী হৈ তেল আমদানি কৰি আহিছে৷

হৰমুজ প্রণালী বন্ধ হ’লে ভাৰতে ইৰাক, ইউএই আৰু ছৌদি আৰবৰ পৰা অন্য পথেৰে তেল আমদানি কৰিবলৈ হ’লে তেলৰ মূল্য বৃদ্ধি হোৱাটো স্বাভাৱিক৷ কিয়নো এই তেল সৰবৰাহৰ ক্ষেত্রত ব্যয় বৃদ্ধি পাব৷ গুৰুত্বপূর্ণ যে ২০০৬–০৭ বর্ষলৈ ভাৰতে ২৭খন দেশৰ পৰা তেল আমদানি কৰিছিল যদিও ২০২১–২২ত ইয়াৰ সংখ্যা ৩৯লৈ বৃদ্ধি কৰা হৈছে৷

ৰাছিয়াৰ পৰাই সম্প্রতি ভাৰতে ৪০ শতাংশতকৈ অধিক খাৰুৱা তেল আমদানি কৰে৷ বাকীখিনি আমেৰিকা, ব্রাজিল, পশ্চিম আফ্রিকা আৰু লেটিন আমেৰিকাৰ পৰা আহে৷ এই আমদানিকৃত তেলখিনি হৰমুজ প্রণালীৰে নাহে৷ ৰাছিয়াৰ তেল ছুৱেইজ খাল, কেপ অৱ গুড হোপ অথবা প্রশান্ত মহাসাগৰেৰে ভাৰতলৈ আহে৷

আমেৰিকা, ব্রাজিল আৰু পশ্চিম এছিয়াৰ পৰা হৰমুজ প্রণালীৰ বাইপাছেৰে আহে৷ ভাৰতলৈ অহা এলএনজিৰ ভিতৰত ৫০ শতাংশৰ অধিকাংশই কাটাৰৰ পৰা আহে৷ এই এলএনজি বিদ্যুৎ, সাৰ আৰু দেশীয় ইন্ধনত ব্যৱহাৰ কৰা হয়৷ তেনেদৰে ৰাসায়নিক সামগ্রী, ধাতু, সাৰ আৰু খাদ্য–সামগ্রী উপ–সাগৰীয় দেশসমূহৰ পৰা আমদানি কৰা হয়৷ এই সামগ্রীসমূহ হৰমুজ প্রণালীৰে আহে৷ গতিকে এই সামগ্রীসমূহৰ মূল্যবৃদ্ধি হোৱাৰ সম্ভাৱনা নুই কৰিব নোৱাৰি৷