পঞ্জাব নেচনেল বেংকৰ কেলেংকাৰিত পলাতক ঘোষিত নীৰৱ মোদীৰ ভাতৃ নেহাল মোদীক আমেৰিকাত গ্ৰেপ্তাৰ কৰা হৈছে। আমেৰিকাৰ কৰ্তৃপক্ষই ভাৰত চৰকাৰক জনাইছে যে পলাতক ব্যৱসায়ী নীৰৱ মোদীৰ ভাতৃ নেহাল মোদীক ৪ জুলাইত আমেৰিকাত গ্ৰেপ্তাৰ কৰা হৈছে। এই গ্ৰেপ্তাৰ ভাৰতৰ দুটা প্ৰধান সংস্থা ইডি (ED) আৰু চিবিআই (CBI)-ৰ পৰা কৰা প্ৰত্যৰ্পণৰ অনুৰোধৰ ভিত্তিত হৈছে।
নেহাল মোদী ভাৰতৰ অন্যতম বৃহৎ বেংকিং কেলেংকাৰি পঞ্জাব নেচনেল বেংক কেলেংকাৰিত জড়িত। তদন্তত প্ৰকাশ পাইছে যে তেওঁ নিজৰ ভাতৃ নীৰৱ মোদীৰ বাবে ক’লা ধন বগা কৰা আৰু লুকুৱাই ৰখাত গুৰুত্বপূৰ্ণ ভূমিকা পালন কৰিছিল। ইডি আৰু চিবিআইৰ তদন্তত এইটোও পোৱা গৈছে যে নেহাল মোদীয়ে বহুতো শ্বেল কোম্পানীৰ জৰিয়তে বিপুল পৰিমাণৰ ধন বিদেশত ইফালে-সিফালে কৰিছিল। তেওঁৰ উদ্দেশ্য আছিল প্ৰতাৰণাৰ দ্বাৰা অৰ্জিত ধনক ট্ৰেকৰ বাহিৰত ৰখা।
নেহাল মোদীৰ প্ৰত্যৰ্পণ শুনানিৰ পৰৱৰ্তী তাৰিখ ১৭ জুলাই, ২০২৫ নিৰ্ধাৰণ কৰা হৈছে। সেইদিন আমেৰিকাৰ আদালতত এটা স্থিতি সন্মেলন (ষ্টেটাছ কনফাৰেন্স) অনুষ্ঠিত হ’ব। আশা কৰা হৈছে যে নেহাল মোদীয়ে সেইদিন জামিনৰ বাবে আবেদন জনাব, কিন্তু আমেৰিকাৰ চৰকাৰী অধিবক্তাসকলে ইয়াৰ বিৰোধিতা কৰিব। ভাৰত চৰকাৰৰ প্ৰচেষ্টা হৈছে নেহাল মোদীক যিমান সোনকালে সম্ভৱ ভাৰতলৈ আনি দেশৰ আইনৰ অধীনত তেওঁৰ বিৰুদ্ধে গোচৰ চলোৱা।
Niyomiya Barta Desk, Date of Published, 5 July