ছমাহ ধৰি খেলপথাৰৰ বাহিৰত থকাৰ পিছতো আইচিচি এদিনীয়া ৰেংকিঙৰ বেটাৰ শাখাত স্থানৰ উন্নতি ঘটিল টীম ইণ্ডিয়াৰ অধিনায়ক ৰোহিত শর্মাৰ৷
সদ্যপ্রকাশিত আইচিচি এদিনীয়া ৰেংকিঙৰ বেটাৰ শাখাত এটা স্থান আগুৱাই দ্বিতীয় স্থানলৈ উন্নীত হ’ল হিটমেন৷ ৩৮ বছৰীয়া ৰোহিত শর্মাই পাকিস্তানৰ বাবৰ আজমক আঁতৰাই দ্বিতীয় স্থানটো অধিকাৰ কৰে৷ ভাৰতীয় দলটোৰ তাৰকা বেটাৰ শুভমন গিলে শীর্ষস্থান অধিকাৰ কৰি থকা বেটাৰ শাখাত ভাৰতৰ বিৰাট কোহলিয়ে চতুর্থ, শ্রেয়াছ আয়াৰে অষ্টম স্থানটো অক্ষুণ্ণ ৰাখিছে৷
মন কৰিবলগীয়া যে কোহলিয়েও বিগত ছমাহ ধৰি খেলপথাৰৰ বাহিৰত আছে৷ ইপিনে, শ্রীলংকাৰ মহীশ থিকছানাই শীর্ষস্থান অধিকাৰ কৰি থকা বলিং শাখাত ভাৰতৰ কুলদীপ যাদৱে দ্বিতীয় আৰু ৰবীন্দ্র জাদেজাই নৱম স্থানটো অক্ষুণ্ণ ৰাখিছে৷
আনহাতে, ভাৰতৰ অভিষেক শর্মাই শীর্ষস্থান দখল কৰি থকা টি–২০ ৰেংকিঙৰ বেটাৰ শাখাত এটা স্থান আগুৱাই ভাৰতৰে তিলক বার্মাই দ্বিতীয় স্থানলৈ উন্নীত হৈছে৷ ইফালে, সূর্যকুমাৰ যাদৱে ষষ্ঠ স্থানটো অক্ষুণ্ণ ৰাখিছে৷
Niyomiya Barta Desk, 14 August, 2025